Brent neftinin qiyməti enməkdə davam edir
Beynəlxalq enerji bazarlarında Brent neftinin bir bareli bu gün 65,61 dollardan alıcı tapıb. Dünən 66,74 dollara qədər yüksələn qiymət, günü 66,07 səviyyəsində bağlamışdı. Bu gün səhər saat 09:13-ə olan məlumata görə, Brent neftində 0,6 faizlik azalma qeydə alınıb. Paralel olaraq, ABŞ istehsalı olan “West Texas Intermediate” (WTI) markalı xam neftin bir bareli 61,83 dollara satılıb.
İraq Kürdüstanından ixrac xəbəri təsir etdi
Qiymətlərin düşməsində əsas səbəblərdən biri İraq Kürd Regional Hökumətinin neft ixracını bərpa edəcəyini açıqlaması olub. Hökumət sözçüsü Peşeva Havramani, mərkəzi hökumət, regional rəhbərlik və beynəlxalq neft şirkətləri arasında üçtərəfli müqavilənin imzalanacağını bəyan edib.
Xatırladaq ki, Parisdəki beynəlxalq arbitraj məhkəməsi ötən ilin martında Bağdad hökumətinin müraciəti əsasında Kərkük və İraq Kürdüstanından Ceyhan limanı üzərindən ixracı dayandırmışdı. Bu qərar bölgənin neft satışını tamamilə iflic etmişdi.
İxracın artması bazara təzyiq göstərir
İraq hökuməti də OPEC+ razılaşması çərçivəsində tətbiq etdiyi könüllü hasilat azaldılmasını mərhələli şəkildə aradan qaldırdığını elan edib. Dövlət Neft Marketinq Şirkəti (SOMO) avqust ayında gündəlik 3,38 milyon barel ixrac edildiyini, sentyabrda bu göstəricinin 3,4–3,45 milyon barel səviyyəsində olacağını bildirib.
Analitiklər hesab edir ki, həm İraq Kürdüstanından ixracın yenidən başlaması, həm də İraqın ixrac həcmini artırması bazarda arz bolluğu narahatlığını gücləndirir.
ABŞ bazarından gözləntilər
Bazar iştirakçıları ABŞ-da tələb göstəricilərini izləməyə davam edir. Dünyanın ən böyük neft istehlakçısı olan ölkədə Amerika Neft İnstitutu bu gün ticarət ehtiyatları ilə bağlı ilkin rəqəmləri açıqlayacaq. Enerji İnformasiya İdarəsinin rəsmi hesabatı isə sabah gözlənilir.
Texniki təhlillərə görə, Brent neftində 68,71 dollar müqavimət, 65,29 dollar isə dəstək səviyyəsi kimi izlənilir.
