Aİ-nin 19-cu sanksiya paketi təqdim edildi
Avropa İttifaqı Rusiyaya qarşı yeni – 19-cu sanksiya paketini açıqlayıb. Avropa Komissiyasının sədri Ursula fon der Leyen Brüsseldə verdiyi açıqlamada paketin həm Rusiyanı, həm də ona dolayı dəstək göstərən xarici ölkələri hədəf aldığını bildirib.
Fon der Leyenin sözlərinə görə, yeni paketdə dondurulmuş Rusiya aktivlərinin Ukrayna üçün maliyyə təminatı məqsədilə istifadəsi nəzərdə tutulur. Eyni zamanda, Rusiya vətəndaşlarına Şengen vizalarının verilməsinə məhdudiyyətlərin tətbiqi təklif olunur.
Enerji şirkətlərinə sərt qadağalar
Yeni sanksiyalar çərçivəsində “Rosneft” və “Qazprom Neft” ilə bütün kommersiya əməliyyatlarının tam qadağan edilməsi planlaşdırılır. Bununla yanaşı, Rusiya xam neftinin qiymət həddi 47,60 dollar müəyyən edilib.
Avropa İttifaqı, həmçinin, Rusiya neftini daşımaqda şübhəli bilinən 118 gəmini qara siyahıya salmağı, əlavə olaraq 45 şirkəti sanksiya siyahısına daxil etməyi nəzərdə tutur.
Maliyyə və texnologiya sektoru hədəfdə
Paketdə yeni Rusiya banklarının və bəzi xarici maliyyə qurumlarının sanksiya siyahısına əlavə olunması da təklif edilir. Bundan başqa, kriptovalyuta platformalarına qarşı daha sərt məhdudiyyətlər nəzərdə tutulur.
Macarıstanın mövqeyi və kompromis
“Financial Times” qəzeti yazır ki, Avropa Komissiyası Macarıstanın mümkün veto qərarının qarşısını almaq üçün Budapeştə təxminən 550 milyon avro vəsaitin ayrılmasına razılıq verib. Bu addımın sanksiyaların yekdilliklə qəbul edilməsinə xidmət etdiyi qeyd olunur.
