Rusiya Prezidenti Vladimir Putinin beynəlxalq iqtisadi əməkdaşlıq üzrə xüsusi nümayəndəsi Kirill Dmitriyev bildirib ki, Avropa İttifaqının (Aİ) yanlış siyasəti yüksək enerji qiymətlərinə və miqrasiya böhranına səbəb olub. Onun sözlərinə görə, Aİ-də liderlər tez-tez dəyişsə də, verilən səhv qərarların fəlakətli nəticələri on illərlə davam edəcək.
Eyni zamanda Rusiya Birbaşa İnvestisiya Fondunun rəhbəri olan Dmitriyev, ABŞ mərkəzli X sosial şəbəkəsində paylaşım edərək, Rusiya ilə Çin arasında razılaşdırılan “Sibirin Gücü-2” təbii qaz kəmərinə diqqət çəkib. O qeyd edib:
“Avropanın sənaye uğuruna güc verən ucuz və etibarlı Rusiya boru kəməri qazı artıq Çinə yönləndiriləcək.”
Dmitriyev vurğulayıb ki, “Sibirin Gücü-2” ilə bağlı imzalanan saziş tarixi əhəmiyyət daşıyır:
“Aİ liderlərinin səhv qərarları Birliyi yüksək enerji qiymətləri, yüksək inflyasiya və miqrasiya böhranı ilə üz-üzə qoyub. Aİ-də liderlər tez-tez dəyişir, amma bu səhv qərarların nəticələri yüzillərlə olmasa da, on illərlə davam edəcək.”
Qeyd edək ki, Rusiya ilə Çin arasında “Sibirin Gücü-2” boru kəməri üzrə dünən anlaşma memorandumu imzalanıb. Bu marşrut vasitəsilə Çinə ildə 50 milyard kubmetrə qədər təbii qaz nəql olunması planlaşdırılır.
