İşğaldan azad edilmiş ərazidə qanunsuz fəaliyyət aşkarlanıb
Ağdərə rayonunun ərazisində qanunsuz şəkildə metal tullantıları topladığı deyilən şəxs saxlanılıb.
Məlumata görə, Tərtər rayonunun Şırxarx kənd sakini, 1981-ci il təvəllüdlü şəxs özünə məxsus “Niva” markalı avtomobillə komendant postundan kənar yolla Ağdərə istiqamətinə gedib.
Polis əməkdaşlarının keçirdiyi yoxlama zamanı avtomobilə baxış keçirilib və maşının salon hissəsində işğaldan azad edilmiş ərazidən toplandığı ehtimal edilən dəmir məmulatları aşkar edilib.
Polis tələbinə əməl etməyib
Araşdırma zamanı məlum olub ki, saxlanılan şəxs polis şöbəsinə dəvət edilərkən qanuni tələblərə əməl etməyib.
Bildirilib ki, o, polis əməkdaşlarına qarşı xırda xuliqanlıq hərəkətləri törədib.
Faktla bağlı barəsində inzibati protokol hazırlanıb.
8 gün inzibati həbs qərarı verilib
Məhkəmənin qərarı ilə 45 yaşlı şəxs 8 gün müddətinə inzibati qaydada həbs edilib.
Qeyd olunur ki, işğaldan azad edilmiş ərazilərdə təhlükəsizlik qaydalarına, xüsusi giriş-çıxış rejiminə və müəyyən edilmiş prosedurlara riayət olunması tələb edilir.
