Xəlil əl-Həyyədən ilk müraciət
HƏMAS-ın siyasi bürosunun yeni rəhbəri Xəlil əl-Həyyə vəzifəyə seçildikdən sonra ilk dəfə ictimaiyyət qarşısında çıxış edib.
O bildirib ki, hərəkatın əsas prioriteti Qəzzada hərbi əməliyyatların tam dayandırılması və Qəzza zolağının tam azad edilməsidir. Əl-Həyyənin sözlərinə görə, Fələstin xalqının təhlükəsizliyi və sabitliyi regionda davamlı sülhün əsas şərtlərindən biridir.
HƏMAS-ın əsas hədəfləri açıqlanıb
Əl-Həyyə qeyd edib ki, hərəkatın ikinci əsas prioriteti Qəzzanın Fələstin dövlətçiliyinin ayrılmaz hissəsi kimi mövqeyinin qorunması, fələstinli məhbusların azad edilməsi və Fələstin xalqının üzləşdiyi humanitar problemlərin aradan qaldırılmasıdır.
O, işğalçı İsrailə beynəlxalq təzyiqin artırılmasının vacibliyini vurğulayaraq, hərbi əməliyyatların dayandırılmasının danışıqlar prosesinin bərpasına imkan yaradacağını bildirib. Əl-Həyyə bu istiqamətdə vasitəçi ölkələrin səylərini də yüksək qiymətləndirib.
Milli dialoq və regional əlaqələr
Yeni siyasi büro rəhbəri çıxışında Fələstin daxilində milli dialoqun genişləndirilməsinin vacibliyinə toxunub.
Onun sözlərinə görə, HƏMAS bütün fələstinli siyasi qüvvələrlə, ilk növbədə Fələstin Azadlıq Təşkilatı ilə dialoqa başlamağın tərəfdarıdır. Əl-Həyyə həmçinin hərəkatın İslam dünyası ilə strateji münasibətlərini gücləndirmək və müxtəlif tərəflərlə əməkdaşlığı inkişaf etdirmək niyyətində olduğunu bildirib.
Qəzza sakinlərinə müraciət edib
Xəlil əl-Həyyə çıxışında Qəzza sakinlərinə də müraciət edərək onların üzləşdiyi çətinliklərin fərqində olduqlarını deyib.
O bildirib ki, HƏMAS Fələstin xalqının hüquqlarının müdafiəsi və üzləşdiyi çətinliklərin aradan qaldırılması istiqamətində fəaliyyətini davam etdirəcək.
Əl-Həyyə həmçinin Şərqi Qüds, İordan çayının qərb sahilində yaşayan fələstinliləri və Fələstin məsələsinə dəstək verən bütün şəxsləri salamlayaraq, bu məsələnin müdafiəsinin onların əsas məsuliyyəti olduğunu vurğulayıb.
Beynəlxalq ictimaiyyətə çağırış
Yeni siyasi büro rəhbəri beynəlxalq ictimaiyyətə müraciət edərək bildirib ki, Qəzzadakı uşaqların qoruna bilmədiyi halda beynəlxalq ədalət prinsiplərinin etibarlılığı ciddi sual altına düşür.
O, çıxışının sonunda HƏMAS-ın öz mövqeyini davam etdirəcəyini və hərəkatın məqsədlərinə nail olacağına inandığını ifadə edib.
Xəlil əl-Həyyənin çıxışı HƏMAS-ın onu təşkilatın siyasi bürosunun rəhbəri seçdiyini rəsmən elan etməsindən sonra baş tutub. O, bu vəzifədə 2024-cü ildə sionist rejim tərəfindən şəhid olan Yəhya Sinvarı əvəz edib.
HƏMAS rəsmisi Usamə Həmdan isə bildirib ki, əl-Həyyənin seçilməsi hərəkatın təşkilati davamlılığını və mövcud siyasi xəttini qoruyub saxladığını göstərir.
