Ümumdünya Səhiyyə Təşkilatının (ÜST) Yəmən nümayəndəsi Arturo Pesiqan on illik qarşıdurmadan sonra Yəməndə humanitar şərait və səhiyyə baxımından dünyanın ən pis böhranlarından birinin yaşanmaqda davam etdiyini bildirib.

Az.rasthaber.org xəbər verir ki, Pesiqan Birləşmiş Millətlər Təşkilatının (BMT) Cenevrə ofisinin həftəlik mətbuat konfransında açıqlama verib.

"Demək olar ki, on il davam edən münaqişədən sonra Yəmən humanitar şərait və səhiyyə baxımından dünyanın ən pis böhranlarından birini yaşamağa davam edir, lakin təəssüf ki, Yəmən çoxları tərəfindən unuduldu. Ölkədə milyonlarla uşaq müharibə şəraitində doğulur, bir çoxu münaqişələrin şahidi olaraq böyüyür, Yəmən xalqı ən çətin humanitar və sağlamlıq böhranlarını yaşayır" deyə Pesiqan qeyd edib.

Pesiqan bildirib ki, işğal olunmuş Fələstin ərazilərində vəziyyət pisləşərkən, Qırmızı dənizdəki son hadisələr və Yəmənə hücumlar sülh və sabitlik naminə çətin əldə edilən irəliləyişi geri çevirə bilər:

"Yəmən xalqı böyük dağıntılar, aclıq və zorakılıq yaşayıb. Onlar sülh və tərəqqi həyatına layiqdirlər. BMT-nin vasitəçiliyi ilə Yəmən üçün atəşkəs və sülh danışıqları uzun müddətdir davam edən münaqişələrin tezliklə sona çatacağına və ölkənin davamlı sülh yolunda olduğuna ümid verir.