Suriya xalqının sevinci xalqın üzərində ağır və sərt hökmranlıq edən diktatura rejiminin süqutu ilə tamamlanmadı.

Az.rasthaber.com xəbər verir ki, suriyalı Ələvi Seyid Şeyx İsa Bədr Sonay beynəlxalq təşkilatlara müraciət edib.

O, müraciətində bildirib:

"Suriya xalqı müasir, əsl vətəndaş dövləti qurmaq üçün mübarizə aparırdı. Bununla belə, hazırda Suriyada azlıqların, xüsusilə də Ələvilər, Xristianlar, Dürzilər, İsmaililər, Mürşidlər və Yezidilərin üzləşdiyi təhlükələr son dərəcə ciddi və narahatedicidir.

Xüsusən də bu təhlükə ilə ən çox üzləşən ələvilərdir, çünki bəzi insanlar baş verənləri tam dərk etmədən Əsəd rejimi dövründə baş verənlərə və rejimin xalqa təzyiqlərinə görə məsuliyyəti ələvilərin üzərinə qoyurlar.

Biz bütün dünya hökumətlərini, ixtisaslaşmış beynəlxalq təşkilatları, insan haqları təşkilatlarını və hüquqşünasları həm Suriyada, həm də Livanda ələvilərin müdafiəsində öz rollarını oynamağa çağırırıq. Livandakı ələvilər də bu təhlükə altındadırlar, bu təhlükənin hədəfi və xəstə doktrina əsaslı intiqam arzusudurlar.

Biz Suriyada keçmiş Yuqoslaviyadakı mənzərələrə bənzər mənzərələri görməkdən narahatıq və çoxlu günahsız insanların ölməsinin qarşısını almaq üçün tədbir görmənizi xahiş edirik."