Pakistanın baş naziri Şahbaz Şərif və nazirlər hökumət xərclərini azaltmağa yönəlmiş qənaət tədbirləri çərçivəsində maaş və müavinətlərdən könüllü olaraq imtina ediblər.

Az.rasthaber.com APA-ya istinadən xəbər verir ki, bu barədə “Pakistan Today” qəzeti məlumat yayıb.

Bundan əvvəl bu həftə Pakistan Prezidenti Asif Əli Zərdari də maaş və müavinətlər almaqdan imtina edib.

Hökumət xərclərinə qənaət etmək üçün tədbirlərin görülməsi Pakistanda fevral ayında keçirilən parlament seçkilərindən sonra formalaşan Şahbaz Şərifin rəhbərlik etdiyi yeni federal hökumətinin ilk addımlarından biri olub. Bazar ertəsi Nazirlər Kabineti dövlət büdcəsinə qənaət etmək məqsədilə nazirlərin və hökumət nümayəndələrinin xaricə səfərlərini məhdudlaşdırıb, həmçinin onların xaricdə olmaları üçün yeni qaydalar tətbiq edib. Federal və əyalət nazirləri, onların müşavirləri və köməkçiləri ildə üç dəfədən çox olmamaqla və yalnız milli büdcəyə qənaəti təmin edən hökumət komitəsinin, habelə Xarici İşlər Nazirliyinin icazəsi ilə xaricə getməlidirlər. Bu məhdudiyyət Xarici İşlər Nazirliyi və Daxili İşlər Nazirliyinin nümayəndələrini də əhatə edir. Xaricə səyahət edərkən onlara beşulduzlu otellərdə qalmaq da qadağandır. Nazirlərin və məmurların xarici ölkələrə səfərlərini azaltmaq üçün Pakistanın xaricdəki səfirliklərinə diplomatları beynəlxalq forum və tədbirlərə mümkün qədər geniş şəkildə cəlb etmək tövsiyə olunur.