Sionist İsrail ordusu, Yəməndəki Ənsarullah Hərəkatı tərəfindən atılan bir raketin hava hücumundan müdafiə sistemi vasitəsilə uğurla zərərsizləşdirildiyini açıqlayıb.

Az.rasthaber.com xəbər verir ki, Yəmənin Ənsarullah Hərəkatı, Sionist İsrailin Qəzzada həyata keçirdiyi qətliamlara qarşı cavab hücumlarına daha birini əlavə edib. İşğalçı İsrail Müdafiə Qüvvələrinin (IDF) yaydığı məlumata görə, Yəməndən atılan raket nəticəsində Qüds, İordan çayının qərb sahilinin cənubundakı yaşayış məntəqələri və İsrailin mərkəzi bölgələrində hava hücumu siqnalları səsləndirilib.
Sionist İsrail mediası erkən xəbərdarlıq sistemi vasitəsilə əhaliyə sığınacaqlara daxil olma çağırışı edildiyini bildirərkən, raketin hava hücumundan müdafiə sistemi tərəfindən zərərsizləşdirildiyini qeyd edib.

Ənsarullah Hərəkatının hərbi sözçüsü Yəhya Səri isə yaydığı yazılı açıqlamada son raket hücumunun məsuliyyətini üzərinə götürərək, Ben Qurion Hava Limanını “Fələstin 2” tipli ballistik raketlə hədəfə aldıqlarını bildirib.
Səri hücumun uğurlu olduğunu iddia edərək, milyonlarla israillinin sığınacaqlara qaçmaq məcburiyyətində qaldığını və hava limanındakı hava nəqliyyatının müvəqqəti olaraq dayandığını vurğulayıb.

Fələstin xalqına dəstəyin davam edəcəyini qeyd edən Səri əlavə edib:
"Bu mübarək günlərdə Qəzzədə və bütün Fələstində dirəniş göstərən mücahidləri salamlayırıq. Yəmən, bu hücumlar sona çatana və mühasirə aradan qalxana qədər xalqı, rəhbərliyi və ordusu ilə birlikdə Fələstin xalqının yanında olacaqdır."