İranın BMT-dəki səfiri və daimi nümayəndəsi Əmir Səid İrəvani Təhlükəsizlik Şurasına və BMT-nin baş katibinə yazdığı məktubda İsrail rejimi nümayəndəsinin İrana qarşı əsassız ittihamlarını və təxribatçı ritorikasını rədd edərək vurğuladı: İran İslam Respublikasının İsrail rejiminə qarşı qanuni hərəkətində müqavimət qruplarından heç biri iştirak etməyib və bununla bağlı hər hansı iddia rədd edilir.

Az.rasthaber.com xəbər verir ki, məktubda deyilir: Hazırkı yazışma İsrail rejiminin BMT-dəki nümayəndəsinin 19 aprel 2024-cü il tarixli məktubuna cavab olaraq hazırlanmışdır. İsrail rejiminin nümayəndəsi bu məktubda növbəti dəfə yalan məlumatlara əl ataraq İran İslam Respublikasına qarşı əsassız ittihamlar irəli sürüb.

İrəvani bu məktubda vurğuladı: İran İslam Respublikası sözügedən məktubda yer alan bütün əsassız ittihamları mütləq və qəti şəkildə rədd edir. Bu cür əsassız iddiaların əksinə olaraq, İran İslam Respublikası ardıcıl olaraq beynəlxalq hüquqa hörmətlə yanaşır, Birləşmiş Millətlər Təşkilatının Nizamnaməsinin prinsiplərinə sadiqdir və BMT Təhlükəsizlik Şurasının qətnamələrinə əməl edir. Bundan əlavə, İran İslam Respublikası müxtəlif sahələrdə konstruktiv iştirakı ilə beynəlxalq sülh və təhlükəsizliyin təşviqində fəal rol oynayıb.