İsrailin döyüş təyyarələri mülki əhalinin həssaslığını nəzərə almadan Qəzza zolağının müxtəlif bölgələrinə intensiv hücumlarını davam etdirib.

Az.rasthaber.com xəbər verir ki, WAFA xəbər agentliyinin və etibarlı mənbələrin yaydığı məlumata əsasən, İsrail Qəzzadakı Nusayrat qaçqınlar düşərgəsi, Şeyx Zayed iqamətgahları və Tel əl-Heva bölgəsinə zərbələr endirib, Şati qaçqın düşərgəsi isə artilleriya atəşinə tutulub.
İsrailin Nusayrat Qaçqınlar Düşərgəsinə endirdiyi hava zərbəsi nəticəsində çox sayda fələstinli həyatını itirib.
Qəzzanın şimalında İndoneziya xəstəxanası yaxınlığındakı Şeyx Zayed iqamətgahları da İsrail döyüş təyyarələri tərəfindən hədəf alınıb.
Əl-Qəssam Briqadaları Qəzzanın müxtəlif bölgələrində irəliləməyə çalışan İsrail qüvvələrinin qarşısını alıb.
''Həmas''ın Teleqram kanalında verilən məlumata görə, şəhərin şimal-qərb və cənub-qərbində intensiv toqquşmalar baş verib. Tel əl-Heva bölgəsində İsrail hərbi maşını hədəf alınıb.

Şatı qaçqın düşərgəsi sahillərində İsrailə məxsus hücum katerinin bombaladığı bildirilib.
Əl-Əqsa Şəhidləri Briqadaları döyüşçülərinin Şeyx Rıdvan bölgəsinin qərbində bir İsrail hərbi avtomobilini raketlə məhv etdiyi və işğalçı qüvvələrlə qarşıdurmada İsrail hərbçiləri arasında yaralananların olduğunu açıqlanıb.
Şahidlərin məlumatına görə, İsrail ordusu Ramallahdakı Birzeit Universitetinin kampusuna hərbi maşınlarla basqın edib.

İsrail əsgərləri Əl-Xəlil şəhərində evlərə basqın edərək Məhəmməd əl-Atraş və Əmir Əbu Ərafe adlı 2 jurnalisti saxlayıb.
İsrail qüvvələri Əl-Xəlil  şəhərinin Devra, Harsa, Halhul bölgələrinə və Əl-Arub qaçqın düşərgəsinə basqın edərək çox sayda fələstinlini həbs edib.

İsrail əsgərləri Beytlehem, Ramallah, Nablus, Kalkilya və Erixa  şəhərlərinə də basqın ediblər. Basqınların keçirildiyi bir çox bölgədə İsrail əsgərləri ilə fələstinlilər arasında qarşıdurmalar yaşanıb.

Erixa və Kalkilya şəhərinə basqın edən İsrail əsgərləri ilə Fələstin silahlı müqavimətçiləri arasında qarşıdurma baş verib.

''Həmas''ın silahlı qanadı İzzəddin əl-Qəssam Briqadaları İsrailin fələstinlilərə və onların müqəddəs dəyərlərinə qarşı davamlı pozuntularına cavab olaraq oktyabrın 7-də səhər saatlarında hərtərəfli hücuma keçib. İsrail qüvvələri də buna cavab olaraq Qəzza zolağına intensiv hücumlara başlayıb. 

Gərginlik səbəbindən hər iki tərəf də çox sayda itki verib.