30.10.2021 11:54:49
İran və dünya gücləri 2015-ci ildən əldə olunmuş nüvə sazişini canlandırmaq üçün Vyana nüvə danışıqlarını bərpa etməklə bağlı razılaşmağa çalışırlar.
Az.rasthaber.com "Sputnik Azərbaycan"-a istinadən xəbər verir ki, bu barədə cümə günü Avropa İttifaqının sözçüsü Peter Stano məlumat verib.
İran tərəfinin danışıqlardakı rəhbəri də oktyabrın 27-də Brüsseldə keçirilən görüşlərdən sonra bildirib ki, bu ilin noyabrın sonuna qədər danışıqlar bərpa edilə bilər.
Avropa İttifaqının nümayəndəsi Peter Stano oktyabrın 27-də Brüsseldə keçirilmiş görüşü faydalı hesab etdiyini bildirib və qeyd edib ki, bu görüş danışıqların bərpası üçün yeni yolun tapılmasını müyyənləşdirməyə kömək edib.
"Biz İran da daxil olmaqla başqa tərəfdaşlarımızla nüvə danışıqlarının bərpası və yenidən bir araya gəlmək üçün görüş tarixi müəyyənləşdirməyə çalışırıq. Apreldən etibarən Tehran və digər 6 güc 2018-ci ildən dayandırılmış nüvə danışıqlarının bərpası ilə bağlı müzakirələr aparır", - deyə Aİ nümayəndəsi bildirib.
Qeyd edək ki, üç il əvvəl ABŞ-ın sabiq prezidenti Donald Trampın nüvə razılaşmasından çəkilməsindən sonra danışıqlar dayandırılıb.
