HƏMAS ABŞ-ın BMT Təhlükəsizlik Şurasındakı Vetosuna sərt reaksiya verib.

Az.rasthaber.com xəbər verir ki, HƏMAS, ABŞ-ın Birləşmiş Millətlər Təşkilatının Təhlükəsizlik Şurasında (BMT TŞ) Qəzzada atəşkəsin təmin olunması üçün təqdim edilən qətnamə layihəsinə veto hüququndan istifadə etməsinin, qatil İsrailin Qəzza zolağında fələstinli mülki şəxslərə qarşı törətdiyi soyqırımına birbaşa dəstək anlamına gəldiyini bəyan edib.

HƏMAS-ın yaydığı yazılı açıqlamada, Qəzzada atəşkəsin təmin olunması məqsədilə BMT Təhlükəsizlik Şurasına təqdim olunan qətnamə layihəsinin ABŞ tərəfindən tək səs ilə veto edilməsinin qınandığı qeyd olunub.

Açıqlamada bildirilib:
“ABŞ-ın vetosu, Vaşinqtonun faşist işğalçı hökumətə qarşı kor-koranə tərəfkeşliyini nümayiş etdirir və Qəzza Zolağında insanlığa qarşı törədilən cinayətləri dəstəklədiyini təsdiqləyir.”

Vaşinqtonun beynəlxalq hüququ heçə saydığına diqqət çəkilən açıqlamada, bu mövqenin fələstinli qanının axıdılmasının qarşısını almağa yönələn bütün beynəlxalq səyləri rədd etdiyini əks etdirən ədəbsiz və təkəbbürlü bir davranış olduğu vurğulanıb.

Açıqlamada həmçinin belə deyilir:
“ABŞ-ın bu mövqeyi, Beynəlxalq Cinayət Məhkəməsi (BCM) tərəfindən axtarılan hərbi cinayətkar — İsrailin baş naziri Benyamin Netanyahunun Qəzzada uşaqlar, qadınlar və yaşlılar da daxil olmaqla günahsız mülki insanlara qarşı həyata keçirdiyi vəhşi soyqırımı müharibəsini davam etdirməsi üçün yaşıl işıq deməkdir və ABŞ-ın İsrailin törətdiyi cinayətlərə tam şəkildə şərik olduğunu göstərir.”

HƏMAS açıqlamasında əlavə edib:
“BMT Təhlükəsizlik Şurasının 20 aydır davam edən müharibəni dayandıra bilməməsi, mühasirəni qıra bilməməsi və ya ərzaq yardımlarını daxil edə bilməməsi, beynəlxalq təşkilatların rolu və İsrailin hər hansı bir məsuliyyət daşımadan və ona qarşı praktik tədbir görülmədən hər gün pozmağa davam etdiyi beynəlxalq qanun və müqavilələrin təsirliliyi ilə bağlı ciddi suallar doğurur.”

Açıqlamanın sonunda beynəlxalq ictimaiyyətə bu mənəvi və siyasi çökməyə qarşı dərhal hərəkətə keçmək, soyqırım müharibəsini dərhal dayandırmaq və İsrail rəhbərlərinin fələstin xalqına qarşı törətdikləri cinayətlərə görə məsuliyyət daşıması üçün təzyiq göstərmək çağırışı edilib.

Qeyd edək ki, Qəzzada atəşkəsin təmin olunması üçün BMT Təhlükəsizlik Şurasına təqdim edilən qətnamə layihəsi HƏMAS-ı qınamadığı bəhanəsi ilə dünən ABŞ-ın tək səsi ilə veto edilmişdi.