İran İslam İnqilabının Rəhbəri Ayətullah Seyid Əli Xamenei Pakistanın Fələstin məsələsində mövqeyini yüksək qiymətləndirib.

Az.rasthaber.com xəbər verir ki, İran İslam İnqilabının Rəhbəri Ayətullah Seyid Əli Xamenei Pakistanın baş naziri Şahbaz Şərif və onu müşayiət edən nümayəndə heyəti ilə görüşüb.

Ayətullah Xamenei Pakistan və Hindistan arasında atəşkəs razılaşmasını alqışlayıb və iki ölkə arasındakı fikir ayrılıqlarının həll ediləcəyinə ümid etdiyini bildirib.

Pakistanın son illərdə Fələstin məsələsində çox yaxşı və qətiyyətli mövqe nümayiş etdirdiyinə işarə edən Ayətullah Xamenei deyib:

“Son illərdə bəzi İslam ölkələri sionist rejimlə əlaqələr qurmaq həvəsində idilər, lakin Pakistan heç vaxt bu cür şübhələrə qapılmayıb”.

İslam ümmətinin müasir dünyada daha böyük gücə çevrilmək potensialına malik olduğunu vurğulayan Ayətullah Xamenei, dünyada ixtilaf və müharibə yaratmaq istəyənlərə qarşı İslam dünyasının təhlükəsizliyini təmin edə biləcək yeganə həll yolunun İslam ölkələri arasında birlik və qarşılıqlı əlaqələrin inkişaf etdirilməsi olduğunu bildirib.

Fələstin məsələsinin İslam dünyasının birinci prioriteti olduğunu bildirən Ayətullah Xamenei Qəzzada baş verən humanitar fəlakətə diqqət çəkərək deyib:

"Qəzzadakı vəziyyətə görə, Avropa və ABŞ-da normal insanlar nümayişlər keçirir və öz hökumətlərinə etiraz edirlər. Təəssüf ki, bəzi İslam dövlətləri sionist rejimin tərəfindədir.

İran və Pakistan birgə işləməklə müsəlman dünyasında və Qəzzada cinayətin qarşısını almaqda təsirli ola bilər”.

Tehran-İslamabad münasibətlərinə gəlincə, Ayətullah Xamenei İran və Pakistan arasında münasibətlərin həmişə isti və qardaşlıq xarakteri daşıdığını bildirib və əlavə edib:

“İki ölkə bir çox sahələrdə bir-birinə kömək edə bilər. Ümid edirik ki, bu səfər qarşılıqlı əlaqələrin daha da möhkəmlənməsinə töhfə verəcək”.