Yəmən ordusundan yeni hərbi əməliyyat açıqlaması
Yəmən Silahlı Qüvvələrinin sözçüsü briqada generalı Yəhya Səri bildirib ki, Qırmızı dənizin şimalında, Yanbu sahilləri yaxınlığında yerləşən Səudiyyə Ərəbistanına məxsus “Vəfa” adlı neft tankeri bir neçə ballistik raketlə hədəfə alınıb.
Onun sözlərinə görə, zərbə dəqiq hədəfə çatıb.
“Mühasirəyə qarşı mühasirə” siyasəti
Yəhya Səri bildirib ki, əməliyyat Yəmən Silahlı Qüvvələrinin Səudiyyə Ərəbistanına qarşı elan etdiyi dəniz blokadası çərçivəsində həyata keçirilib və “mühasirəyə qarşı mühasirə” strategiyasının tərkib hissəsidir.
O qeyd edib ki, iyulun 22-dən etibarən başlanılan dəniz blokadası dövründə Səudiyyə Ərəbistanına məxsus ümumilikdə səkkiz neft tankeri hədəfə alınıb.
29 tanker geri qayıtmağa məcbur edilib
Yəmən Silahlı Qüvvələrinin məlumatına görə, Qırmızı və Ərəb dənizlərində ümumilikdə 29 Səudiyyə neft tankerinin hərəkətinin qarşısı alınıb və onlar marşrutlarını dəyişərək geri dönməyə məcbur olublar.
Əməliyyatların davam edəcəyi bildirilib
Yəhya Səri qeyd edib ki, Babülməndəb boğazında tətbiq olunan dəniz blokadasından sonra Səudiyyə Ərəbistanı neft tankerlərinin marşrutunu Qırmızı dənizin şimal hissəsinə dəyişib.
Onun sözlərinə görə, Yəmən Silahlı Qüvvələri bundan sonra da Səudiyyə Ərəbistanına məxsus neft tankerlərini hədəfə almağa davam edəcək və bu əməliyyatlar genişləndiriləcək.
Əvvəlki hücum da xatırladılıb
Yəmən Silahlı Qüvvələri bir gün əvvəl də Səudiyyə Ərəbistanının Nəcran hava limanında yerləşən həssas obyektin pilotsuz uçuş aparatı ilə vurulduğunu açıqlamışdı.
Yəmən tərəfi həmin əməliyyatın Səudiyyə Ərəbistanının Səədə və Həccə vilayətləri üzərində pilotsuz uçuş aparatlarından istifadə etməsinə cavab olaraq həyata keçirildiyini bildirmişdi.
