Yəməndən Səudiyyə Ərəbistanına ittiham
Yəmən Silahlı Qüvvələrinin sözçüsü briqada generalı Yəhya Səri bildirib ki, Səudiyyə Ərəbistanına məxsus döyüş təyyarələri Səna hava limanına enməyə çalışan İran mülki təyyarəsinin qarşısını almaq məqsədilə Yəmənin hava məkanını pozub.
Onun sözlərinə görə, təyyarədə xaricdə qalmış, yaralanmış və müalicəyə ehtiyacı olan 200-dən çox Yəmən vətəndaşı olub.
“Hava hücumundan müdafiə sistemləri işə salındı”
Yəhya Səri bildirib ki, Yəmən Silahlı Qüvvələri Səudiyyə Ərəbistanına məxsus hərbi təyyarələri hava hücumundan müdafiə raketləri ilə hədəfə alıb.
O bildirib ki, nəticədə döyüş təyyarələri Yəmən hava məkanını tərk etməyə məcbur olub.
“Əmrləri yerinə yetirməyə hazırıq”
Yəmənli hərbi sözçü ölkənin bütün silahlı qüvvələrinin “Ənsarullah” hərəkatının lideri Əbdülməlik əl-Husinin verəcəyi istənilən qərarı icra etməyə hazır olduğunu bildirib.
Səri həmçinin ölkə əhalisini ümumi səfərbərliyi davam etdirməyə və döyüş hazırlığını yüksək səviyyədə saxlamağa çağırıb.
İran təyyarəsi Sənaya enib
Səna xəbər agentliyinin məlumatına görə, İranın mülki təyyarəsi Səna Beynəlxalq Hava Limanına eniş edib.
Məlumatda qeyd olunur ki, təyyarə ilə xaricdə qalmış 200-dən çox Yəmən vətəndaşı ölkəyə gətirilib.
Bununla yanaşı, Yəmənin rəsmi nümayəndə heyətinin də həmin təyyarə ilə Tehrana yollanaraq Ayətullah Seyid Əli Xameneinin dəfn mərasimində iştirak etmək üçün İrana səfər etdiyi bildirilir.
