Yəmən Müstəzəf Xalqlar Üçün Müjdədir

Allahın adı ilə

Məlum olduğu kimi, Yer kürəsi coğrafi baxımdan ekvator xətti və ya sıfırıncı paralel vasitəsilə Şimal və Cənub yarımkürələrinə, Qrinviçdən keçən sıfırıncı meridian vasitəsilə isə Qərb və Şərq yarımkürələrinə bölünür. Lakin geosiyasi mənada Cənub və Şimal anlayışları fərqli mənalarda istifadə olunur.

XX əsrin ikinci yarısında inkişaf etmiş kapitalist ölkələr üçün “Birinci Dünya”, Sovet İttifaqının rəhbərlik etdiyi sosialist ölkələr üçün “İkinci Dünya”, inkişaf etməkdə olan ölkələr üçün isə “Üçüncü Dünya” anlayışlarından istifadə edilirdi.

1990-cı illərdə Sovet İttifaqının dağılması və bununla birlikdə İkinci Dünyanın da sona çatması nəticəsində “Üçüncü Dünya” anlayışı da aradan qalxdı. Onun yerinə “Qlobal Cənub” termini işlədilməyə başlandı.

“Qlobal Cənub” anlayışı hamısı Cənub yarımkürəsində yerləşməyən, Afrika, Asiya və Latın Amerikasına yayılmış müxtəlif ölkələri ifadə edir.

ABŞ onilliklər boyunca Qlobal Cənub ölkələrini özünün dünya liderliyinə tabe etdirmək üçün onlara təzyiq göstərib. Bunu əsasən Cənub yarımkürəsində yerləşən həmin ölkələr üçün yeganə münasib tərəfdaşın özü olduğu kimi fərziyyələrə əsaslanaraq, bu ölkələrdəki zəif, asılı və kukla rejimlər üzərində hərbi, iqtisadi və siyasi təzyiqlər yaratmaqla həyata keçirib.

1979-cu ildə İranda baş verən İslam İnqilabı sadəcə hakimiyyət dəyişikliyi deyil, həm də dünyaya hakim olan Qərb sivilizasiyasına qarşı yeni bir sivilizasiyanın müjdəçisi idi.

Tövhid mərkəzli bu sivilizasiya hərəkatı təbii olaraq dünya siyasi ədəbiyyatına öz terminlərini təqdim etməyə başladı. ABŞ üçün “Böyük Şeytan”, ABŞ-yə bənzəməyə çalışan ekspansionist, müstəmləkəçi və işğalçı qüvvələr üçün “Kiçik Şeytanlar”, yaxud onların hamısı üçün “Müstəkbir Qüvvələr”, əzilən, istismar edilən və zəif vəziyyətə salınmış ölkələrin xalqları üçün isə “Müstəzəflər” kimi terminlərdən istifadə etməyə başladı. “Qlobal Cənub” anlayışının əvəzinə daha aydın, daha qalıcı və əhatəli olan “Müstəzəflər” terminini üstün tutdu.

Çünki bu dövrdə başda Çin olmaqla Rusiya və Hindistan kimi ölkələr Qərbin hegemonluq sisteminə qarşı müqavimət göstərsələr də, hərbi və iqtisadi baxımdan müəyyən mövqeyə çatdıqdan sonra özləri də təkəbbür göstərməyə, özlərini superliqada görməyə, G7 və G20 kimi birliklərə qoşulmağı böyük fəxr mənbəyi hesab etməyə başladılar.

Şeytani, müstəkbir, yəni özünü üstün görən və üstünlük iddiasında olan bu insanlıq düşməni qüvvələrə qarşı müstəzəfləri qiyama və müqavimətə çağıran İslam İnqilabı bütün sahələrdə olduğu kimi, mübarizə sahəsində də alışılmış üsullardan fərqli metodlar təqdim edirdi. Zülmə məruz qalsa belə zülm etməkdən çəkinmək, fədakarlıq, cəsarət, güzəştə getməmək, şəhadət və digər dəyərlərə yeni mənalar qazandırdı.

ABŞ-nin başçılıq etdiyi Qərb imperialist ölkələrinin kökləri bir neçə əsr əvvələ gedib çıxan bu hegemonluqlarını davam etdirmələrində ən təsirli amil, şübhəsiz ki, inkişaf etmiş silahlara və hərbi gücə malik olmaları idi. İqtisadi gücü də hərbi gücdən istifadə etməklə, zorakılıqla və başqa xalqların sərvətlərini zorla ələ keçirməklə əldə edə bilirdilər.

Müstəzəf xalqların müstəkbir, imperialist və hegemon qüvvələrə qarşı mübarizədə insani dəyərlərdən uzaq olan bu qüvvələrin iqtisadi və hərbi səviyyəsinə çatmaları həm mümkünsüz, həm də bir o qədər qeyri-insani olduğundan, öz inandıqları dəyərləri qoruyaraq müqavimətə keçməkdən başqa çarələri yoxdur.

Biz bu mübarizə üsulunu yaşadığımız dövrdə İran, Yəmən, Qəzza və Livana qarşı başladılmış müharibələrdə açıq şəkildə görürük. Qəddar düşmən heç bir insani dəyərə məhəl qoymadan məktəbləri, xəstəxanaları və yaşayış məntəqələrini vəhşicəsinə bombardman edərək on minlərlə mülki şəxsi qətlə yetirdiyi halda, Müqavimət Oxunun döyüşçüləri hərbi və iqtisadi mərkəzlərə hücum etməklə cavab verirlər. Yaxud İran nüvə silahı hazırlamaq üçün hər cür texniki və elmi imkanlara malik olmasına baxmayaraq, kütləvi qırğın silahlarının istehsalını haram hesab edir.

Müqavimət Oxuna daxil olan ölkə və hərəkatların müharibəsi müdafiə, çəkindirmə və eyni şəkildə cavab vermə prinsipinə əsaslandığı üçün onlar əslində təcavüzkar imperialist qüvvələrə qarşı asimmetrik müharibə üsulundan istifadə edirlər.

Trilyon dollarlıq hərbi büdcəyə malik ABŞ və onun müttəfiqləri qarşısında 10–15 milyard dollarlıq hərbi büdcə ilə müqavimət göstərən İranın gözlənilməz uğurlar qazanması, eləcə də on bir ildir embarqo və blokada altında olan Yəmənin Ənsarullah hökumətinin Səudiyyə rejimi və onun müttəfiqlərinə qarşı nümayiş etdirdiyi fəaliyyət Müqavimət Cəbhəsinin izlədiyi strategiya və taktikaların effektivliyini ortaya qoyur.

Məhz buna görə də ABŞ-nin təyyarədaşıyan gəmiləri və F-35 təyyarələri başda olmaqla ən müasir hərbi texnikası bir ilə yaxındır İranın öz istehsalı olan ucuz raket və pilotsuz uçuş aparatları qarşısında təsirsiz vəziyyətə düşüb.

Belə ki, yüz milyard dollara yaxın hərbi büdcəyə və trilyon dollarlıq neft gəlirlərinə malik Səudiyyə rejimi bütün bu mühasirələrə və hava bombardmanlarına baxmayaraq, Yəmənin Ənsarullah hökuməti qarşısında acizlik və çarəsizlik içində çırpınır, ABŞ-dən İngiltərəyə, Avropa İttifaqı ölkələrindən Amerika düşərgəsində yer alan İslam ölkələrinə qədər hər kəsdən yardım dilənir.

Məhz buna görə deyirik ki, dünyanın ən yoxsul ölkələrindən biri olan Yəmənin bütün imkansızlıqlara baxmayaraq, İslam İnqilabının ruhundan ilham alaraq və asimmetrik müharibə üsulundan istifadə edərək Səudiyyə Qarunları qarşısında qazandığı qələbələr bütün dünya məzlumları və müstəzəfləri üçün bir müjdədir.

2026-cı il hərbi büdcəsi 2,5 milyard dollar olan, ordusu müasir əməliyyat döyüş təyyarələrindən məhrum qalan və yalnız raketlər, pilotsuz uçuş aparatları və adi silahlarla döyüşən yəmənli inqilabçılar bir nümunədir.

Ölkələri hər cür işğala, istismara və təzyiqə məruz qalmış xalqların artıq qiyam etməmək üçün heç bir bəhanəsi qalmayıb. Yəmən nümunəsində olduğu kimi, yetər ki, mübarizə aparmaq üçün iradə ortaya qoysunlar və müqavimətə hazırlaşsınlar. Haqlının və məzlumun himayədarı olan Allahın yardımı ilə mütləq qələbəyə çatacaqlar.

Allah-Təala buyurur:

“…Həqiqətən, Allah bir qövmün vəziyyətini onlar özlərində olanı dəyişməyincə dəyişməz…”

Rəd surəsi, 11-ci ayə.