“Foreign Policy”: Diplomatiya üçün yanaşma dəyişməlidir
ABŞ-ın “Foreign Policy” jurnalı dərc etdiyi təhlildə İranla qarşıdurmanın sona çatdırılması üçün Prezident Donald Trampın “məğlubiyyəti diplomatik şəkildə qəbul etməyi bacarmalı olduğunu” irəli sürüb.
Nəşrin qiymətləndirməsinə görə, Tramp administrasiyası İran siyasətini formalaşdıran yanlış ehtimalları yenidən nəzərdən keçirməli və yüksək xərclərə səbəb olduğu bildirilən mövcud yanaşmadan uzaqlaşmalıdır.
ABŞ-ın danışıqlardakı mövqeyinin zəiflədiyi iddia olunur
“Foreign Policy” yazır ki, Tramp administrasiyası problemin əsas səbəbini qarşıdurmanın miqyası və müddətində görsə də, münaqişənin uzanması ABŞ-ın danışıqlardakı təsir imkanlarını zəiflədib.
Jurnalın fikrincə, bu vəziyyət Vaşinqtonun gələcək diplomatik addımlarını daha mürəkkəb edib.
“NBC News”: Tramp administrasiyasında narazılıq artır
Məqalədə, həmçinin “NBC News” telekanalının yaydığı məlumata da istinad edilir.
Həmin xəbərə görə, Donald Tramp İranla bağlı münaqişənin həlli istiqamətində aparılan səylərin nəticə verməməsindən narazıdır və administrasiya daxilində hansı strategiyanın seçilməsi ilə bağlı fikir ayrılıqları mövcuddur.
“NBC News”un Trampa yaxın mənbəyə istinadən yaydığı məlumata əsasən, ABŞ Prezidenti İranı razılaşmaya cəlb etməyin bu qədər çətin olacağını gözləməyib. Mənbənin iddiasına görə, administrasiya daxilində münaqişənin hansı müddətdə və hansı mexanizmlə başa çatdırılacağına dair aydın strategiya da formalaşdırılmayıb.
