Tramp atəşkəsin qüvvədə olduğunu açıqladı
ABŞ prezidenti Donald Tramp “ABC News” telekanalına açıqlamasında İranla atəşkəsin qüvvədə olduğunu bildirib.
Tramp qeyd edib ki, razılaşma hazırda icra olunur və proses davam edir.
Hörmüz boğazı ilə bağlı açıqlama verdi
ABŞ prezidenti dünya səviyyəli üç Amerika hərbi gəmisinin Hörmüz boğazından uğurla keçdiyini iddia edib.
Onun sözlərinə görə, İran tərəfindən həmin gəmilərə qarşı hücum cəhdləri olub, lakin ABŞ qüvvələri atılan raketləri asanlıqla zərərsizləşdirib.
Tramp bildirib ki, Amerika hərbi gəmiləri zərər görməyib, İran tərəfi isə ciddi itkilərlə üzləşib.
“İrana qarşı dəniz blokadası keçilməzdir”
ABŞ prezidenti Vaşinqtonun İrana qarşı tətbiq etdiyi dəniz blokadasını “keçilməsi mümkün olmayan polad divar” adlandırıb.
O, ABŞ qüvvələrinin bölgədə tam nəzarəti qoruduğunu və təhlükəsizlik tədbirlərinin gücləndirildiyini vurğulayıb.
İran ABŞ-ı atəşkəsi pozmaqda günahlandırır
İran Silahlı Qüvvələri isə ABŞ-ı atəşkəsi pozmaqda ittiham edib.
İranın “Xatəmül-Ənbiya” Mərkəzi Komandanlığı bildirib ki, ABŞ ordusu İran neft tankerini və mülki əraziləri hədəfə aldıqdan sonra İran qüvvələri Hörmüz boğazının şərqində və Çabahar limanının cənubunda yerləşən ABŞ hərbi gəmilərinə zərbələr endirib.
Məlumata görə, hücum nəticəsində Amerika tərəfi ciddi itkilər verib.
İran SEPAH-ı ABŞ gəmilərinin geri çəkildiyini bildirir
İran İnqilab Keşikçiləri Korpusu kəşfiyyat məlumatlarına əsasən ABŞ qüvvələrinin ağır zərbə aldığını açıqlayıb.
SEPAH həmçinin üç ABŞ hərbi gəmisinin Hörmüz boğazı ərazisindən sürətlə uzaqlaşdığını bildirib.
Daha əvvəl İran Hərbi Dəniz Qüvvələri Hörmüz boğazında təhlükəsiz keçidin yalnız “təhdidlərin zərərsizləşdirilməsi və yeni protokolların tətbiqi” ilə mümkün olacağını açıqlamışdı.
Vaşinqton və Tehran arasında müvəqqəti razılaşma müzakirə olunur
Bu arada “Reuters” agentliyi ABŞ və İranın müvəqqəti razılaşmaya yaxınlaşdığı barədə məlumat yayıb.
Agentliyin mənbələrinə görə, tərəflər hərbi əməliyyatların dayandırılması üçün qısamüddətli çərçivə sənədi üzərində işləyirlər.
Bildirilib ki, əsas fikir ayrılıqları hələ də qalır və mümkün razılaşma müvəqqəti xarakter daşıyacaq.
