Ben-Qvirin həbsxanadakı təhdidinə reaksiya
Fələstinli Məhbusların Media Ofisi işğalçı İsrailin qondarma milli təhlükəsizlik naziri İtamar Ben-Qvirin kameralar qarşısında fələstinli məhbus Həsən Sələməni edamla hədələməsini pisləyib.
Ofisin yaydığı bəyanatda bildirilib ki, həbsxanada müdafiəsiz və qandallı məhbusa qarşı bu cür davranış qəbuledilməzdir. Qurum Ben-Qvirin hərəkətini məhbuslara qarşı təzyiq siyasətinin nümayişkaranə təzahürü kimi qiymətləndirib.
Bəyanatda həbsxana daxilində bir məhbusun ölümlə açıq şəkildə hədələnməsinin Həsən Sələmənin həyatına qarşı birbaşa təhdid yaratdığı açıqlanıb
Media Ofisinin məlumatına görə, Sələmə uzun illərdir ağır həbs şəraiti ilə üzləşir.
“Ucuz seçki təbliğatıdır”
Fələstinli Məhbusların Media Ofisi Ben-Qvirin açıqlamasının daxili siyasi məqsədlərə xidmət etdiyini irəli sürüb.
Qurum bunu “ucuz siyasi və seçki təbliğatı” kimi xarakterizə edərək, fələstinli məhbuslara qarşı sərt ritorikanın siyasi dəstək qazanmaq üçün istifadə olunduğunu bildirib.
Bəyanatda vurğulanıb ki, bu cür təhdidlər Həsən Sələmə və digər fələstinli məhbusların mövqeyini dəyişməyəcək.
Media Ofisi Ben-Qvirin yayımlanan görüntülərində Sələmənin fiziki vəziyyətinin də diqqət çəkdiyini bildirib. Qurum onun görünüşünün uzunmüddətli ağır həbs şəraitinin nəticələrini əks etdirdiyini qeyd edib.
İsrail tərəfi Sələmənin həyatına görə məsul tutulub
Fələstinli Məhbusların Media Ofisi işğalçı İsrail hakimiyyətini Həsən Sələmənin həyatı və təhlükəsizliyinə görə tam məsuliyyət daşıdığını bəyan edib.
Qurum beynəlxalq və insan hüquqları təşkilatlarını məsələ ilə bağlı təcili addımlar atmağa çağırıb. Bəyanatda həbsxanalardakı fələstinli məhbusların müdafiəsi üçün beynəlxalq səviyyədə tədbirlərin görülməsi tələb olunub.
Ofis həmçinin məhbuslara qarşı aclıq, tibbi yardımın məhdudlaşdırılması, təcrid və digər təzyiq üsullarının tətbiq edildiyini açıqlayıb.
HƏMAS-dan da açıqlama gəldi
HƏMAS da Ben-Qvirin Həsən Sələmə ilə bağlı yayımladığı görüntülərə münasibət bildirib.
Hərəkat bəyanatında videonun Sələmə və digər fələstinli məhbuslara qarşı yeni zorakılıq hallarının baş verə biləcəyi ilə bağlı narahatlıq yaratdığını qeyd edib.
HƏMAS işğalçı İsrail həbsxanalarındakı fələstinli məhbusların azadlığa buraxılmasının təşkilatın əsas məsələlərindən biri olaraq qalacağını bildirib.
Hərəkat sionist Ben-Qvirin açıqlamalarının məhbusları və onların ailələrini çəkindirməyəcəyini də vurğulayıb.
Sionist Ben-Qvirin məhbuslarla bağlı siyasəti mübahisə doğurur
Sionist İtamar Ben-Qvir daha əvvəl də işğalçı İsrail həbsxanalarında saxlanılan fələstinlilərlə bağlı sərt tədbirləri müdafiə edən açıqlamaları ilə gündəmə gəlib.
Ötən ay onun Negev həbsxanasına səfər etdiyi və fələstinli məhbusların qalan geyimlərinin müsadirə olunması ilə bağlı göstəriş verdiyi bildirilmişdi.
Ben-Qvir 2022-ci ilin sonunda vəzifəyə gəldikdən sonra həbsxanalardakı qaydaların sərtləşdirilməsini müdafiə edib. Fələstinli məhbuslarla məşğul olan qurumlar isə bu siyasətin onların əsas hüquqlarının məhdudlaşdırılmasına, tibbi xidmətlərə çıxışın çətinləşməsinə və həbs şəraitinin ağırlaşmasına səbəb olduğunu bildirirlər.
Həsən Sələmə ilə bağlı son görüntülər isə məhbusların vəziyyətini yenidən Fələstin gündəminin əsas mövzularından birinə çevirib.
