ABŞ ərəb ölkələrinin iştirakını açıqladı
ABŞ Mərkəzi Komandanlığı-nın (“Sentkom”) rəhbəri Bred Kuper bildirib ki, Vaşinqton İrana qarşı əməliyyatlar zamanı bir sıra ərəb ölkələri ilə hərbi əməkdaşlığı genişləndirib.
Kuperin sözlərinə görə, Birləşmiş Ərəb Əmirlikləri, Bəhreyn, Səudiyyə Ərəbistanı, Küveyt və İordaniya ABŞ qüvvələrinə dəstək və logistika imkanları təqdim edib. O əlavə edib ki, İsrail də əməliyyatlarda fəal iştirak edib.
Körfəz ölkələrinin dəstəyi vurğulandı
ABŞ rəsmisi bildirib ki, Körfəz Əməkdaşlıq Şurasına daxil olan altı ölkədən beşi və İordaniya ABŞ qüvvələrinin əməliyyatlarını dəstəkləyib.
Onun sözlərinə görə, bu ölkələr əməliyyatlar zamanı Amerika qüvvələrinə müxtəlif səviyyələrdə yardım göstərib.
“İran hələ də təhlükə yarada bilər”
ABŞ Senatının Silahlı Qüvvələr Komitəsində keçirilən dinləmələrdə çıxış edən Kuper bildirib ki, İran son dövrlərdə ağır zərbələr alsa da, hələ də hərbi potensialını tam itirməyib.
O iddia edib ki, ABŞ qüvvələri 40 gündən az müddətdə İranın hərbi imkanlarının təxminən 90 faizini sıradan çıxarıb.
Kuper həmçinin bildirib ki, bu əməliyyatlar nəticəsində İranın regional müttəfiqləri – Həmas, Hizbullah və Ənsarullah silah əldə etməkdə çətinliklərlə üzləşiblər.
Livan və Hizbullah məsələsi
“Sentkom” rəhbəri qeyd edib ki, Hizbullahla mübarizə mürəkkəb məsələdir, çünki təşkilat Livanın sosial strukturu ilə sıx bağlıdır.
O bildirib ki, Vaşinqton Hizbullahın silahsızlaşdırılması prosesində Livan ordusuna dəstək verməyə davam edəcək.
“İŞİD” və Afrikadakı təhlükə
Kuper çıxışında ABŞ-ın 5 mindən çox İŞİD üzvünü İraq hökumətinə təhvil verdiyini də açıqlayıb.
Digər tərəfdən, AFRICOM rəhbəri Daqvin Anderson bildirib ki, “İŞİD” və “Əl-Qaidə” Afrikada fəaliyyətlərini genişləndirir və bu vəziyyət ABŞ maraqları üçün təhlükə yaradır.
O əlavə edib ki, qitədə Rusiya və Çin təsiri də sürətlə artır.
ABŞ kəşfiyyatı Tramp administrasiyasına zidd məlumat yayıb
Bundan əvvəl The New York Times qəzeti ABŞ kəşfiyyatının məxfi hesabatlarına istinadən yazmışdı ki, İran yeraltı raket bazalarının və buraxılış sistemlərinin əksəriyyətini yenidən istifadəyə qaytara bilib.
Bu məlumatlar Tramp administrasiyasının İranın hərbi imkanlarının tamamilə məhv edildiyi barədə açıqlamaları ilə ziddiyyət təşkil edir.
