Rutte ABŞ-nin hücumlarını müdafiə etdi
NATO-nun Baş katibi Mark Rutte Ankarada keçirilən NATO Zirvəsi çərçivəsində jurnalistlərə açıqlamasında ABŞ-nin İrana qarşı həyata keçirdiyi son hərbi zərbələrin “tamamilə zəruri” olduğunu bildirib.
Rutte iddia edib ki, atəşkəs qüvvədə olduğu halda İran onun şərtlərini pozub və buna görə də Vaşinqtonun sərt cavab verməsi vacib idi.
“Atəşkəs mövcud olduğu halda İran onu pozdu. Belə bir vəziyyətdə ABŞ-nin qətiyyətli cavab verməsi son dərəcə vacib idi”, – deyə o bildirib.
NATO-dan Hörmüz boğazı mesajı
Baş katib qeyd edib ki, NATO üzvlərinin bugünkü iclasda iki əsas məsələyə dair ortaq mövqelərini bir daha təsdiqləyəcəklərini gözləyir.
Onun sözlərinə görə, ilk məsələ İranın heç vaxt nüvə silahına sahib olmamasıdır.
İkinci əsas məsələ isə beynəlxalq gəmiçilik azadlığıdır. Rutte bildirib ki, Hörmüz boğazının tam şəkildə açıq qalması strateji baxımdan böyük əhəmiyyət daşıyır.
“Bu, bütün müttəfiqlər üçün həyati əhəmiyyət daşıyır”
Mark Rutte vurğulayıb ki, Hörmüz boğazında təhlükəsiz və maneəsiz gəmiçiliyin təmin olunması NATO-nun bütün 32 üzvü üçün mühüm əhəmiyyət kəsb edir.
O bildirib ki, boğazın tam fəaliyyət göstərməsi qlobal enerji təchizatı və beynəlxalq ticarətin fasiləsiz davam etməsi baxımından strateji zərurətdir.
NATO Baş katibi əlavə edib ki, müttəfiqlər bu mövqeni Ankara Zirvəsində bir daha təsdiqləməyi planlaşdırırlar.
