Kiyev və Lvov da daxil olmaqla 7 bölgə hədəf alınıb
Rusiya Müdafiə Nazirliyi Ukraynanın Kiyev və Lvov şəhərləri, eləcə də İvano-Frankivsk, Jitomir, Rivne, Vinnitsa və Dnepropetrovsk vilayətlərində yerləşən hərbi obyektlərə kütləvi zərbələr endirdiyini açıqlayıb.
Nazirliyin məlumatına görə, hücumlar gecə saatlarında quru, hava və dəniz bazalı uzaqmənzilli yüksək dəqiqlikli silahlar, eləcə də pilotsuz uçuş aparatları ilə həyata keçirilib.
Hərbi aerodromlar və logistika mərkəzləri vurulub
Açıqlamada bildirilib ki, zərbələrin əsas hədəfləri hərbi aerodromlar, müdafiə sənayesi müəssisələri, hərbi telekommunikasiya qovşaqları və logistika mərkəzləri olub.
Rusiya tərəfi iddia edir ki, həmin obyektlər müxtəlif təyinatlı raket sistemləri və pilotsuz uçuş aparatlarının istehsalı, saxlanılması və daşınması, həmçinin hava məkanına nəzarət sistemlərinin fəaliyyətinin təmin edilməsi üçün istifadə olunurdu.
Silah daşıdığı iddia edilən gəmilər də vurulub
Rusiya Müdafiə Nazirliyinin açıqlamasında Yujnı limanında yerləşən bir quru yük gəmisinin, həmçinin Odessanın şərq və cənub istiqamətində silah və hərbi sursat daşıdığı iddia olunan daha iki quru yük gəmisinin də zərbələr nəticəsində vurulduğu bildirilib.
Ukrayna tərəfi isə Rusiya Müdafiə Nazirliyinin səsləndirdiyi bu iddialarla bağlı hələlik rəsmi açıqlama verməyib.
