ABŞ ordusundan nəhəng müdafiə müqaviləsi
ABŞ Müdafiə Nazirliyi ölkə ordusunun “Lockheed Martin” şirkəti ilə 58,62 milyard dollar dəyərində müqavilə bağladığını açıqlayıb.
Yeddi ili əhatə edən müqavilə “Patriot” hava hücumundan müdafiə sistemləri üçün tutulmuş ələkeçirici raketlərin istehsalını nəzərdə tutur. Pentaqon bu müqaviləni ABŞ-ın müdafiə ehtiyatlarını gücləndirmək istiqamətində atılmış ən mühüm addımlardan biri kimi qiymətləndirir.
Silah ehtiyatlarının azalması qərara təsir edib
Məlumata görə, ABŞ son illərdə Ukrayna və İsrail başda olmaqla müttəfiqlərinə böyük həcmdə silah və sursat göndərib.
Bundan əlavə, Vaşinqtonun müxtəlif hərbi əməliyyatlarda yüksək dəqiqlikli döyüş sursatlarından istifadə etməsi hava hücumundan müdafiə sistemləri və digər strateji silah ehtiyatlarının azalması ilə bağlı narahatlıqları artırıb.
Müqavilə 2032-ci ilə qədər qüvvədə olacaq
ABŞ ordusu bildirib ki, yeni razılaşma bu ilin aprelində imzalanmış 4,7 milyard dollarlıq birillik müqavilənin genişləndirilməsi əsasında hazırlanıb.
Yeni sənəd 2026–2032-ci maliyyə illərini əhatə edən çoxillik satınalma proqramını nəzərdə tutur və “Patriot” raketlərinin fasiləsiz istehsalını təmin edəcək.
İstehsal üç dəfədən çox artırılacaq
Hazırda “Lockheed Martin” ildə təxminən 600–620 ədəd “Patriot” ələkeçirici raketi istehsal edir. Bu isə ayda orta hesabla 50–52 raket deməkdir.
Şirkətin yeni istehsal planına əsasən, illik istehsal gücünün 2 min raketə çatdırılması hədəflənir. Bu da aylıq istehsalın təxminən 166 raketə yüksəldilməsi deməkdir.
Yaponiya lisenziya ilə istehsal edir, Ukrayna da eyni hüququ istəyir
Hazırda ABŞ-dan başqa yalnız Yaponiya rəsmi lisenziya əsasında PAC-3 və PAC-3 MSE tipli “Patriot” raketlərini yerli müəssisələrdə yığır. Bununla belə, Tokio əsas komponentlərin bir hissəsini ABŞ-dan idxal edir və ildə təxminən 20–30 raket istehsal edərək yalnız öz müdafiə ehtiyaclarını qarşılayır.
Məlumata görə, Ukrayna da Yaponiyaya verilənə bənzər istehsal hüququ əldə etməyə çalışır. Məqsəd ölkənin ən azı daxili tələbatının bir hissəsini yerli istehsal hesabına ödəmək və Rusiyanın ballistik raket hücumlarına qarşı müdafiə imkanlarını gücləndirməkdir.
