Mərkəzi Bank qərar qəbul etdi
Azərbaycan Respublikası Mərkəzi Bankının İdarə Heyətinin 27 iyul 2026-cı il tarixli qərarı ilə Bank “BTB” ASC-nin bank lisenziyası ləğv edilib. Qərar bankın öz müraciəti əsasında qəbul olunub.
Mərkəzi Bankın yaydığı məlumata görə, “Banklar haqqında” Qanunun müvafiq maddələrinə və “Bankların yenidən təşkili haqqında Qaydalar”a uyğun olaraq Bank “BTB” ASC yenidən təşkil edilib. Bankın hüquqi varisi kimi isə “T-Kredit” Bank Olmayan Kredit Təşkilatı” MMC-yə lisenziya verilib.
Yenidən təşkil prosesi başa çatdı
Xatırladılıb ki, Mərkəzi Bankın 5 mart 2026-cı il tarixli qərarı ilə Bank “BTB” ASC-nin bank olmayan kredit təşkilatına çevrilməsinə əvvəlcədən razılıq verilmişdi.
Yenidən təşkil prosesi çərçivəsində bankın əmanətçiləri və digər kreditorları qarşısında öhdəliklərinin yerinə yetirilməsi planı təsdiqlənib, kreditorların məlumatlandırılması təmin olunub.
Bu müddətdə Bank “BTB” ASC ilə “Azərbaycan Beynəlxalq Bankı” ASC (ABB) arasında aktiv və öhdəliklərin ötürülməsi haqqında müqavilə imzalanıb. Müqaviləyə əsasən, bankın aktiv və öhdəlikləri ABB-yə tam şəkildə ötürülüb.
Müştərilərin əmanət və kreditləri ABB-yə keçib
Mərkəzi Bank bildirib ki, Bank “BTB” ASC-nin müştərilərinə məxsus müddətli və tələbli depozitlər heç bir şərti dəyişdirilmədən ABB-yə köçürülüb. Bununla da müştərilərin öz vəsaitlərindən fasiləsiz istifadə etməsi təmin olunub.
Eyni zamanda, kredit portfelinin ötürülməsi prosesi də yekunlaşdırılıb. Bank qarşısında kredit və digər öhdəlikləri olan müştərilərin müqavilələri qüvvədə saxlanılıb və tələb hüquqları ABB-yə verilib.
“T-Kredit” fəaliyyətini davam etdirəcək
Qərara əsasən, Bank “BTB” ASC-nin lisenziyası ləğv edildikdən sonra onun hüquqi varisi olan “T-Kredit” Bank Olmayan Kredit Təşkilatı” MMC fəaliyyətini Bakı şəhəri, Nigar Rəfibəyli küçəsi 9 ünvanında davam etdirəcək.
Bankın sahibi kim idi?
Qeyd edək ki, Bank “BTB” ASC Prezident Administrasiyasının sabiq rəhbəri Ramiz Mehdiyevin ailəsinə məxsus bank kimi tanınırdı.
Ramiz Mehdiyev hazırda dövlətçilik əleyhinə xüsusilə ağır cinayətlər törətməkdə ittiham olunur və barəsində ev dustaqlığı qətimkan tədbiri seçilib.
