Tramp: Tarixi razılaşma əldə olunub
ABŞ Prezidenti Donald Tramp “Truth Social” platformasında paylaşdığı açıqlamada “Sülh Şurası”nın Qəzzadakı HƏMAS və digər silahlı Fələstin qruplarının silah məsələsi ilə bağlı “tarixi razılaşma” əldə etdiyini bildirib.
Trampın sözlərinə görə, razılaşma çərçivəsində Qəzzanın idarəçiliyinin yeni Fələstin hökumətinə verilməsi nəzərdə tutulur.
O, həmçinin qeyd edib ki, beynəlxalq sabitlik qüvvələri yeni yaradılacaq Fələstin polis qüvvələri ilə birlikdə Qəzza zolağında fəaliyyət göstərəcək, İsrail qoşunlarının isə silahla bağlı proses başa çatdıqdan sonra mərhələli şəkildə bölgədən çıxarılması planlaşdırılır.
Əl-Məyadin: Sənəd silah məsələsinin şərtlərini açıqlayır
Əl-Məyadin televiziyasının əldə etdiyini bildirdiyi Şarm əl-Şeyx razılaşmasının icra sənədində ağır silahların qeydiyyata alınması və xüsusi anbarlarda saxlanılması ilə bağlı mexanizmlər əks olunub.
Sənədə əsasən, bu proses Şarm əl-Şeyx Protokolu üzrə qalan öhdəliklər yerinə yetirildikdən, Milli Komitə fəaliyyətə başladıqdan və beynəlxalq sabitlik qüvvələri Qəzzada yerləşdirildikdən sonra həyata keçiriləcək.
Proses beynəlxalq nəzarət altında aparılacaq
Sənəddə qeyd olunur ki, icra planı 14 gün ərzində hazırlanacaq və zərurət yarandığı halda Beynəlxalq Yoxlama Komitəsinin qərarı ilə bu müddət uzadıla bilər.
Məlumata görə, proses İsrail qüvvələrinin Qəzzada nəzarət etdikləri ərazilərdən mərhələli şəkildə çıxması ilə paralel həyata keçiriləcək.
Həmçinin Beynəlxalq Yoxlama Komitəsinin prosesə nəzarət edəcəyi, beynəlxalq sabitlik qüvvələrinin isə bu fəaliyyətə dəstək verəcəyi bildirilir.
Sənəddə Fələstin dövləti ilə bağlı müddəa da yer alıb
Əl-Məyadinin yayımladığı məlumata görə, sənəddə Fələstin qruplarının prosesdə iştirak edəcəyi, silahların İsrailə və ya hər hansı qeyri-fələstinli tərəfə təhvil verilməyəcəyi vurğulanır.
Sənəddə, həmçinin yeddinci və onuncu bəndlər icra edildikdən sonra Qəzza zolağında silahların saxlanılması və idarə olunması səlahiyyətinin yalnız Milli Komitəyə məxsus olacağı qeyd edilir.
Əl-Məyadinin məlumatına əsasən, razılaşma sənədi silah məsələsinin həllini Fələstin xalqının öz müqəddəratını təyin etməsi və müstəqil Fələstin dövlətinin yaradılmasına aparan etibarlı siyasi proseslə əlaqələndirir.
