Miqrant mərkəzi qarşısında gərginlik artdı
ABŞ-nin Nyu-Cersi ştatının Newark şəhərində yerləşən Delaney Hall Miqrant Saxlanma Mərkəzi qarşısında keçirilən etiraz aksiyası zorakılıq hadisələri ilə müşayiət olunub.
Gün ərzində həm ABŞ Miqrasiya və Gömrük Mühafizəsi Xidmətinə (ICE) qarşı çıxan qruplar, həm də qurumu dəstəkləyən şəxslər mərkəz qarşısında toplaşıb. Axşam saatlarında isə vəziyyət nəzarətdən çıxaraq polis və etirazçılar arasında toqquşmaya çevrilib.
Yerli mənbələrin məlumatına görə, etiraz aksiyasına qatılanların sayı 200 nəfəri keçib.
Polis gözyaşardıcı qazdan istifadə etdi
Hadisələr bəzi nümayişçilərin saxlanma mərkəzinin ətrafında quraşdırılmış metal baryerləri aşmağa çalışması ilə başlayıb.
Bundan sonra əraziyə Nyu-Cersi ştat polisi cəlb olunub. Polis izdihamı dağıtmaq üçün gözyaşardıcı qazdan istifadə edib.
Şahidlərin sözlərinə görə, bəzi etirazçılar təhlükəsizlik qüvvələrinə daş və şüşə qablar atıb. Polis isə aksiyanı nəzarət altına almaq üçün müdaxilə edib.
Küçələrə od qoyuldu
Qarşıdurma zamanı saxlanma mərkəzinin yerləşdiyi küçədə od yandırıldığı bildirilib. Gərginliyin artmasından sonra əraziyə atlı polis bölmələri də göndərilib.
Nyu-Cersi ştatının qubernatoru Miki Şerrill hadisələrdən əvvəl nümayişçiləri sakit olmağa çağırmışdı. O, sonradan verdiyi açıqlamada polis müdaxiləsinin zəruri olduğunu bildirib.
Qubernator xüsusilə ştat xaricindən gələn şəxsləri bölgədə xaos yaratmamağa çağırıb.
Küçəyə çıxış məhdudlaşdırıldı
Polislə etirazçılar arasında qarşıdurmanın daha da böyüməsindən sonra şəhərin bəzi hissələrində küçəyə çıxış məhdudiyyəti tətbiq olunub.
Yerli hakimiyyət orqanları təhlükəsizlik tədbirlərinin gücləndirildiyini və vəziyyətin nəzarətdə saxlanılması üçün əlavə qüvvələrin hazır vəziyyətə gətirildiyini açıqlayıb.
ICE niyə etirazların mərkəzindədir?
ABŞ Miqrasiya və Gömrük Mühafizəsi Xidməti ölkədə qanunsuz miqrantların saxlanılması və deportasiya proseslərinə cavabdeh federal qurumdur.
Son dövrlərdə ABŞ-də miqrantlara qarşı əməliyyatların və saxlanmaların artması müxtəlif şəhərlərdə geniş etirazlara səbəb olub. ICE fəaliyyəti ölkədə immiqrasiya siyasəti ilə bağlı mübahisələrin əsas mövzularından birinə çevrilib.
Analitiklər hesab edir ki, miqrasiya məsələsi qarşıdakı siyasi proseslərdə də ABŞ gündəminin ən həssas mövzularından biri olaraq qalacaq.
