Medvedev Almaniyanı sərt şəkildə hədələdi
Rusiya Təhlükəsizlik Şurası sədrinin müavini Dmitri Medvedev Almaniyanın nüvə silahına sahib olmağa yaxınlaşmasının Moskvanın bütün mümkün cavab tədbirlərini işə salmasına səbəb ola biləcəyini deyib.
Medvedev bildirib ki, belə bir addım yalnız Rusiyanı deyil, ABŞ-ni də ciddi şəkildə narahat edəcək. Onun sözlərinə görə, Almaniyanın bu istiqamətdə atacağı addımlar Avropadakı təhlükəsizlik balansını dəyişə bilər.
“Almaniyanı geosiyasi məğlubiyyət gözləyir”
Rusiyalı siyasətçi Almaniyanın Ukrayna məsələsində yanlış siyasət yürüdüyünü iddia edib. O bildirib ki, Berlini Ukrayna müharibəsində “ağır geosiyasi məğlubiyyət” gözləyir.
Medvedev həmçinin Almaniyanın İkinci Dünya müharibəsindən sonra revanşist siyasətə qayıtdığını iddia edib. O, bu kursun artıq rəsmi xarakter aldığını söyləyib.
“Avropa sivilizasiyası təhlükə altına düşə bilər”
Rusiya rəsmisi mümkün hərbi qarşıdurmanın nəticələrinin son dərəcə ağır olacağı barədə də xəbərdarlıq edib.
Medvedev qeyd edib ki, Almaniya ilə birbaşa hərbi münaqişə baş verərsə, Rusiya Almaniyanın məşhur sənaye potensialını məhv edə və hətta Avropa sivilizasiyasını təhlükə altına sala biləcək addımlar ata bilər.
Bu açıqlama Rusiyanın son dövrlərdə Qərbə qarşı istifadə etdiyi ən sərt bəyanatlardan biri kimi qiymətləndirilir.
Moskva Ukrayna siyasətini tənqid edir
Medvedev Almaniya və Avropa İttifaqının Ukraynaya güclü dəstək verməsini də tənqid edib. O bildirib ki, Avropa ölkələrinin Rusiyanı “əbədi düşmən” kimi təqdim etməsi üçün əsas yoxdur.
Rusiya tərəfi uzun müddətdir Qərbin Ukraynaya hərbi yardımlarını regionda gərginliyi artıran əsas amillərdən biri kimi göstərir.
Avropada nüvə təhlükəsizliyi müzakirələri genişlənir
Medvedevin açıqlamaları Avropada nüvə çəkindirmə siyasəti və təhlükəsizlik məsələlərinin daha geniş müzakirə olunduğu dövrə təsadüf edir.
Son həftələr Almaniya və digər Avropa ölkələrinin rəsmiləri müdafiə imkanlarının gücləndirilməsinin vacibliyini vurğulayıblar. Bu müzakirələr ABŞ-ın Almaniyadakı hərbi mövcudluğunu azaltmaq planlarından sonra daha da intensivləşib.
NATO sözçüsü Alison Hart da Avropanın müdafiə xərclərini artırmalı və ortaq təhlükəsizlik məsuliyyətində daha böyük pay götürməli olduğunu bildirib.
