“Maariv”: İran kiberməkanda hücumları genişləndirir
İsrailin “Maariv” qəzeti bazar günü yayımladığı hesabatda İranın İsrailə qarşı genişmiqyaslı kiber müharibəyə başladığını və bu fəaliyyətlərin ölkənin təhlükəsizliyinə ciddi zərər vurmaq potensialına malik olduğunu bildirib. Qəzetin yazdığına görə, son günlər baş verən hadisələr kiberməkanda təhlükənin miqyasının getdikcə böyüdüyünü göstərir.
Məlumata əsasən, İsrailin keçmiş baş naziri Naftali Bennettin “Telegram” hesabının sındırılmasından və yazışmaların yayımlanmasından sonra hakerlər tərəfindən əlavə mesaj göndərilib. Həmin mesajlarda kibercinayətkarlar İsrail hökumətinin nazirlərinin, Knesset üzvlərinin, siyasi fiqurların və yüksəkvəzifəli dövlət məmurlarının telefonlarını və sosial şəbəkə hesablarını da sındırdıqlarını iddia ediblər.
Mobil telefonlara sızma ehtimalı
“Maariv” qeyd edir ki, ehtimal var ki, hücum edən tərəf həqiqətən də bəzi israilli şəxslərin mobil telefonlarındakı tətbiqlərə sızmağa nail olub. Qəzetə görə, bu cür hücumların real miqyası və sızmaların dərinliyi yaxın günlərdə daha aydın şəkildə üzə çıxacaq.
Şin Bet: İranla əlaqəli casusluq işi
İsrailin daxili təhlükəsizlik xidməti olan “Şabak” da iki gün əvvəl açıqlama yayaraq təxminən 30 yaşlı Rusiya vətəndaşı Vitali Zviaqintsevin saxlanıldığını bildirib. O, İsraildə işləyən əcnəbi fəhlə olub və İran kəşfiyyat strukturları ilə əməkdaşlıqda şübhəli bilinir.
Araşdırmalar göstərib ki, Vitali 2025-ci ilin oktyabrından etibarən özünü Rusiyada yaşayan “Roman” adı ilə təqdim edən İran kəşfiyyat əməkdaşı ilə əlaqə saxlayıb. Onun göstərişi ilə Vitali turist örtüyü altında İsrailin müxtəlif limanlarında infrastruktur obyektlərini və gəmiləri çəkib, bunun müqabilində isə rəqəmsal yollarla pul alıb.
Qəzetin yazdığına görə, bu hadisə “Şabak” tərəfindən ifşa edilən 34-cü, bəlkə də 35-ci belə işdir və hələ açıqlanmayan başqa faktların da mövcud olduğu istisna edilmir.
“İran rəqəmsal müstəvidə böyük imkanlara malikdir”
“Maariv”in hesabatında bildirilir ki, İran bu dəfə İsrailə qarşı mübarizəni əsasən rəqəmsal müstəviyə daşıyıb. Buraya mobil telefonların, rəqəmsal hesabların və sosial şəbəkələrin sındırılması, həmçinin İsraildə yaşayan və ya turist kimi ölkədə olan gənclərin casusluq fəaliyyətinə cəlb edilməsi cəhdləri daxildir.
Qəzet vurğulayır ki, bu fəaliyyətlər klassik casusluq forması olmasa da, İsrailin təhlükəsizliyinə ciddi zərər vurmaq gücünə malikdir və bu təhlükəni yüngül saymaq olmaz.
Məqsəd: qorxu yaratmaq və cəmiyyəti sarsıtmaq
Hesabatda qeyd olunur ki, İran kiberməkanda geniş fəaliyyət göstərərək bir neçə məqsəd güdür: İsrail cəmiyyətində qorxu yaratmaq, vətəndaşlara hər kəsin haker hücumlarına açıq olduğu hissini aşılamaq, dövlətə sədaqətdə çatlar formalaşdırmaq və cəmiyyətdə ruh düşkünlüyünü artırmaq.
İsrail təhlükəsizlik qurumları tənqid olunur
“Maariv” İsrailin təhlükəsizlik və hərbi qurumlarını da tənqid edib. Bildirilib ki, ölkədə kiber təhlükəsizliklə məşğul olan qurumlar arasında ciddi koordinasiya problemi var. Bu sahədə “Şabak”, Milli Kiber İdarəsi, Milli Təhlükəsizlik Şurası, İsrail ordusunun müxtəlif bölmələri və Müdafiə Nazirliyinə bağlı gizli strukturlar fəaliyyət göstərir.
Qəzet yazır ki, müdafiənin ən effektiv yolu hücumdur, lakin İsrail hazırda İranın rəqəmsal hücumlarına qarşı adekvat hücum strategiyası nümayiş etdirmir.
“Tehranda hələ də işıqlar yanır”
Məqalədə vurğulanır ki, İsrailin keçmiş baş nazirinin hesabı sındırılsa da, Tehranda hələ də həyat normal axarında davam edir. Telefon və internet sistemləri işləyir, bankomatlar və yanacaqdoldurma məntəqələri fəaliyyətini dayandırmayıb. Bu isə İsrailin kiberhücumlarının İran üçün ciddi çəkindirici təsir yaratmadığını göstərir.
Qəzet sonda İsrailin bu sahədəki davranışını 7 oktyabrdan əvvəl Livan cəbhəsi və Qəzza qarşısında tutduğu mövqeyə bənzədərək, təhlükənin lazımi səviyyədə qiymətləndirilmədiyini qeyd edib.
