Aun: Hücumların vaxtı təsadüfi deyil
Livan Prezidenti Cozef Aun bildirib ki, Cənubi Livanda baş verən genişmiqyaslı partlayışlar vəziyyəti daha da gərginləşdirir və “Çərçivə Razılaşması”nın həyata keçirilməsi prosesinə birbaşa təhlükə yaradır.
Onun sözlərinə görə, bu hadisələrin Roma şəhərində keçiriləcək və razılaşmanın icrasına həsr olunmuş iclas ərəfəsində baş verməsi mənfi mesaj xarakteri daşıyır.
Cənubi Livanda güclü partlayışlar
Məlumata görə, İsrail qüvvələri Cənubi Livanda Mənsuri və Məcdəl Zun ətrafında mağara və yaşayış evlərini partladıb.
Bundan əlavə, gecə saatlarında Yəhmur əş-Şəqif, Ərnun və Kəfr Təbnit bölgələrində də iri partlayışlar baş verib. Partlayışların səsi Livanın cənubunun böyük hissəsində, eləcə də İqlim əl-Xərrub və Xəldə bölgələrində eşidilib.
Yaşayış məntəqələrinə ziyan dəyib
Partlayışlar nəticəsində bəzi evlərə ziyan dəyib. Yerli sakinlər güclü təkan hiss etdiklərini, ərazidə barıt qoxusunun yayıldığını bildiriblər.
Hadisələr Livan hakimiyyətinin ABŞ-nin vasitəçiliyi ilə İsraillə aparılan danışıqlar və “Çərçivə Razılaşması” çərçivəsində müzakirələri davam etdirdiyi bir vaxta təsadüf edib.
