Keçmiş deputat Netanyahunun açıqlamalarını tənqid edib
Ərəb Millətçi Partiyasının sədri və İsrail parlamentinin (Knesset) sabiq üzvü Məhəmməd Həsən Kənan Sputnik-ə müsahibəsində Benyamin Netanyahunun İsrailin ABŞ yardımından imtina edə biləcəyi barədə fikirlərini tənqid edib.
Kənan bildirib ki, İsrail nə ABŞ-dən, nə də Vaşinqtonun təqdim etdiyi hərbi, siyasi və iqtisadi dəstəkdən imtina edə biləcək vəziyyətdə deyil.
“Bu, seçki təbliğatıdır”
Onun sözlərinə görə, Netanyahunun açıqlamaları seçkiöncəsi ictimai rəyə hesablanmış siyasi mesajlardan ibarətdir.
Kənan iddia edib ki, İsrail hökuməti ölkəni xarici dəstək olmadan güclü və iqtisadi cəhətdən tam müstəqil dövlət kimi təqdim etməyə çalışır, lakin bu, reallığı əks etdirmir.
ABŞ-nin hərbi dəstəyinə diqqət çəkib
Keçmiş deputat bildirib ki, Vaşinqtonun silah və sursat yardımı olmasaydı, Qəzza, Livanın cənubu, İran və digər istiqamətlərdə baş verən hadisələrin gedişi tamamilə fərqli ola bilərdi.
Onun fikrincə, ABŞ-nin hərbi dəstəyi İsrailin təhlükəsizlik strategiyasının əsas sütunlarından biridir.
“İsrail ABŞ olmadan bir ay da davam gətirə bilməz”
Məhəmməd Həsən Kənan vurğulayıb ki, ABŞ-nin dəstəyi yalnız hərbi sahə ilə məhdudlaşmır.
Onun sözlərinə görə, Vaşinqtonun siyasi, iqtisadi və diplomatik dəstəyi də İsrail üçün həyati əhəmiyyət daşıyır.
Kənan iddia edib ki, fasiləsiz Amerika dəstəyi olmadan İsrail mövcud vəziyyətdə bir ay belə fəaliyyətini davam etdirə bilməz.
