ABŞ-nin yanacaqdaşıyan təyyarələri bazanı tərk etdi
Bolqarıstan Müdafiə naziri Dimitər Stoyanov ABŞ-yə məxsus iki hərbi yanacaqdaşıyan təyyarənin ölkə ərazisindən çıxarıldığını açıqlayıb.
Məlumata görə, “KC-135” tipli iki təyyarə cümə günü Bolqarıstandakı “Bezmer” aviabazasını tərk edib.
Təyyarələr təxminən bir ay əvvəl ABŞ-nin hərbi razılaşması çərçivəsində müvəqqəti olaraq Bolqarıstanda yerləşdirilmişdi.
Təyyarələrin yerləşdirilməsi İranın etirazına səbəb olmuşdu
ABŞ-nin bu addımı İranın sərt reaksiyası ilə qarşılanmışdı.
Bolqarıstan parlamenti iyulun 22-də ABŞ-nin müraciəti əsasında “Bezmer” aviabazasında 8-dək “KC-135” tipli yanacaqdaşıyan təyyarənin və təxminən 250 ABŞ hərbçisinin yerləşdirilməsinə razılıq vermişdi.
Razılaşma hərbi obyektlərdən birgə istifadə çərçivəsində həyata keçirilirdi.
Lakin bu qərar həm İranın etirazına, həm də bölgə sakinlərinin narahatlığına səbəb olmuşdu.
Yerli sakinlər hücum təhlükəsindən narahat idi
Bolqarıstandakı bəzi sakinlər ABŞ hərbi təyyarələrinin ölkə ərazisində yerləşdirilməsinə qarşı çıxaraq mümkün təhlükələrdən narahat olduqlarını bildiriblər.
Onlar İran tərəfindən raket və pilotsuz uçuş aparatları ilə mümkün hücumların baş verə biləcəyindən ehtiyat ediblər.
Tehran Sofiyaya xəbərdarlıq etmişdi
İran Xarici İşlər Nazirliyi daha əvvəl Bolqarıstan hökumətinə ABŞ təyyarələrinin “Bezmer” aviabazasında yerləşdirilməsi ilə bağlı etirazını çatdırmışdı.
Tehran bu qərarın İrana qarşı hərbi əməliyyatlarda istifadə oluna biləcəyini bildirərək Sofiyanı addımı yenidən nəzərdən keçirməyə çağırmışdı.
İran tərəfi xəbərdarlıq etmişdi ki, ərazisinin İrana qarşı hərbi məqsədlərlə istifadəsinə icazə verilməsi Bolqarıstanı mümkün qarşıdurmada tərəf edə bilər.
