Məsqətdə ilk birgə iclas keçirilib
İranın xarici işlər nazirinin hüquqi və beynəlxalq məsələlər üzrə müavini Kazım Qəribabadi Omanın paytaxtı Məsqətə səfəri çərçivəsində Hörmüz boğazı üzrə yaradılmış İran–Oman Birgə Komissiyasının ilk iclasının keçirildiyini açıqlayıb.
Onun sözlərinə görə, görüş zamanı tərəflər Hörmüz boğazının gələcək idarə olunması ilə bağlı fikir mübadiləsi aparıblar.
Boğazın idarə olunması müzakirə olunub
Qəribabadi bildirib ki, müzakirələr İran və Oman arasında imzalanmış anlaşma memorandumuna uyğun şəkildə aparılıb.
Tərəflər Hörmüz boğazına sahili olan dövlətlərin hüquqlarının qorunmasının və beynəlxalq dəniz naviqasiyasının təhlükəsizliyinin təmin edilməsinin vacibliyini vurğulayıblar.
Dialoqun davam etdirilməsi planlaşdırılır
Bundan əvvəl İranın xarici işlər naziri Abbas Əraqçi Omanın xarici işlər naziri Bədr əl-Busaidi ilə görüşündə Hörmüz boğazında idarəetmə və dəniz naviqasiyası xidmətlərinin gələcəyini müəyyənləşdirmək üçün dialoqun başlanmasına dair razılıq əldə olunduğunu açıqlamışdı.
İran və Oman daha əvvəl imzaladıqları memorandum çərçivəsində Hörmüz boğazında gəmiçiliyin idarə olunmasını müzakirə etmək üçün birgə komissiyanın yaradılması barədə razılığa gəlmişdilər.
Bu komissiyanın əsas məqsədi strateji əhəmiyyət daşıyan Hörmüz boğazında təhlükəsiz və sabit naviqasiyanın təmin olunması, eləcə də sahilyanı dövlətlərin hüquqlarının qorunmasıdır.
