Azərbaycan Üzərindən 2 Milyard Dollarlıq Gizli Pul Köçürməsi İddiası

Kuşnerin telefonu ilə bağlı kəşfiyyat iddiaları

ABŞ Prezidenti Donald Trampın kürəkəni və keçmiş baş müşaviri Cared Kuşner milyardlarla dollarlıq gizli hesablar və beynəlxalq pul köçürmələri barədə iddiaların mərkəzinə düşüb.

Jurnalist Metyu Koulun yeni kitabından “Veniti Fer” jurnalında dərc edilən hissədə Kuşnerin ABŞ administrasiyasında vəzifədə olduğu dövrdə Birləşmiş Ərəb Əmirlikləri (BƏƏ) və Səudiyyə Ərəbistanı ilə əlaqələndirilən maliyyə əməliyyatlarından bəhs edilir.

Oktyabrın 22-də yayımlanan materialda Niderland kəşfiyyatının Kuşnerin telefon məlumatlarına çıxış əldə etdiyi və Dubayla İsraildəki hesablarla əlaqəli pul hərəkətlərini izlədiyi iddia olunur.

İddiaların əsasını ümumi məbləği təxminən 2 milyard dollara çatan maliyyə vəsaitləri və Azərbaycan üzərindən həyata keçirildiyi bildirilən köçürmələr təşkil edir.

Niderland kəşfiyyatı məlumatları necə əldə edib?

Metyu Koulun yazdığına görə, Niderlandın Hərbi Kəşfiyyat və Təhlükəsizlik Xidməti 2017-ci ildə Rusiyanın Baş Kəşfiyyat İdarəsi ilə əlaqəli bir kompüter müdaxiləçisinin köməyi ilə Rusiyadakı gizli serverə daxil olub.

Həmin serverdə Cared Kuşnerin mobil telefonundan əldə edildiyi bildirilən ekran görüntüləri aşkarlanıb.

Bu məlumatların Niderland kəşfiyyat mütəxəssislərinə Kuşnerin rəqəmsal fəaliyyətini araşdırmaq imkanı verdiyi iddia edilir.

Materialda 2018-ci ilin əvvəllərində telefondakı təhlükəsizlik boşluğundan istifadə olunaraq cihazın ekranındakı fəaliyyətin izlənməyə başlandığı bildirilir.

Bunun nəticəsində Kuşnerin istifadə etdiyi tətbiqlər və maliyyə əməliyyatları barədə məlumatların əldə olunduğu irəli sürülür.

Azərbaycan üzərindən Dubaya yüz milyonlarla dollar köçürülüb?

Kəşfiyyatın əldə etdiyi iddia olunan məlumatlar arasında Dubaydakı bank hesabına böyük məbləğdə pul köçürmələri də yer alır.

Metyu Koulun məlumatına əsasən, yüz milyonlarla dollar Azərbaycandakı banklardan biri vasitəsilə Dubaya göndərilib.

Lakin jurnalist vəsaitlərin əsl mənbəyinin Azərbaycan deyil, BƏƏ və Səudiyyə Ərəbistanı rəhbərliyi olduğunu iddia edir.

Azərbaycan banklarının 6–7 faiz komissiya aldığı iddiası

Materialda bəzi Azərbaycan banklarının böyük məbləğlərin ABŞ dollarına çevrilməsi və beynəlxalq köçürmələrin həyata keçirilməsi müqabilində 6–7 faiz komissiya aldığı irəli sürülür.

İddialara görə, bu əməliyyatlar vəsaitlərin həqiqi mənbəyinin müəyyənləşdirilməsini çətinləşdirən maliyyə marşrutu yaradıb.

Bununla belə, dərc olunan materialda köçürmələrə vasitəçilik etdiyi iddia edilən bankların adları açıqlanmayıb.

Həmçinin əməliyyatların tam siyahısı və təfərrüatları ictimaiyyətə təqdim edilməyib.

Dubaydakı ilk hesabda 750 milyon dollar

Materialda “Alfa” adlandırılan ilk hesabın BƏƏ-də fəaliyyət göstərən Birinci Əbu-Dabi Bankında yerləşdiyi bildirilir.

Koulun iddiasına görə, 2017-ci ildən etibarən bu hesaba təxminən 750 milyon dollar köçürülüb.

Hesabın BƏƏ hökuməti tərəfindən maliyyələşdirilən “Vətəni Əl-Əmarat” Fonduna məxsus olduğu irəli sürülür.

Kuşnerin hesab üzərində əməliyyat səlahiyyəti olduğu iddia edilir

Jurnalist fondun rəsmi fəaliyyətindən əlavə, gizli hərbi və kəşfiyyat əməliyyatlarının maliyyələşdirilməsində istifadə olunduğunu iddia edir.

Məlumata görə, Kuşner həmin hesabın birbaşa sahibi olmayıb.

Lakin onun hesab üzrə əməliyyat aparmaq səlahiyyəti olan imza sahiblərindən biri olduğu irəli sürülür.

Beləliklə, Koulun iddiası Kuşnerin həmin vəsaitlərin şəxsi sahibi olması deyil, xarici hökumətlə əlaqəli maliyyə mənbələrindən istifadə səlahiyyətinə malik olması ilə bağlıdır.

Sionist Rejimə Azərbaycan üzərindən 1 milyard dollar göndərildiyi iddia olunur

Materialdakı ikinci böyük iddia BƏƏ rəhbəri Məhəmməd bin Zayedin 2018-ci ilin yazına qədər təxminən 1 milyard dolları Azərbaycan üzərindən İsrailə köçürməsi ilə bağlıdır.

İddia olunur ki, həmin vəsait Kuşnerin istifadəsinə təqdim edilmək üçün göndərilib.

İsrail Mərkəzi Bankındakı gizli hesab

Koulun məlumatına görə, “Beta” adlandırılan ikinci hesab İsrail Mərkəzi Bankında saxlanılıb.

Jurnalist bu hesabla bağlı əməliyyatların İsrailin o zamankı baş naziri Benyamin Netanyahunun da diqqətində olduğunu iddia edir.

Mənbələrin bildirdiyinə görə, Netanyahu Kuşnerin hesabdan hər hansı əməliyyat həyata keçirməzdən əvvəl özünün məlumatlandırılmasını istəyib.

Bu istiqamətdə mesajların ABŞ-nin o dövrdəki İsrail səfiri Devid Fridman vasitəsilə çatdırıldığı irəli sürülür.

İddialar dörd ölkəni əhatə edən maliyyə əlaqələrinə yönəlib

Dərc edilən materialda irəli sürülən iddialar BƏƏ və Səudiyyə Ərəbistanından qaynaqlandığı bildirilən vəsaitlərin Azərbaycan üzərindən Dubaya və İsrailə köçürülməsi ilə bağlıdır.

Məqalədə bu maliyyə əməliyyatlarının Cared Kuşnerin çıxış imkanına malik olduğu iddia edilən hesablarla əlaqələndirildiyi göstərilir.

Eyni zamanda, İsraildəki hesabla bağlı əməliyyatlarda Benyamin Netanyahunun məlumatlandırılmasının tələb edildiyi irəli sürülür.

Lakin materialda adı çəkilən Azərbaycan bankları açıqlanmadığı və pul köçürmələrinin tam sənədləri təqdim olunmadığı üçün bu məlumatlar jurnalistin irəli sürdüyü iddialar kimi qalır.