İran XİN-dən Sidneydəki hücuma reaksiya
İranın Xarici İşlər Nazirliyi Avstraliyanın Sidney şəhərində yəhudi icmasına məxsus tədbiri hədəf alan silahlı hücumu kəskin şəkildə pisləyib. Nazirliyin yaydığı bəyanatda bildirilib ki, baş verən hadisə nəticəsində ölən və yaralanan mülki şəxslər İran tərəfindən qətiyyətlə qınanır.
İran XİN-in sözçüsü İsmayıl Bəqai “X” sosial şəbəkəsində paylaşdığı açıqlamada Sidneydə baş verən hücumu dəyərləndirərək vurğulayıb ki, “terror və insanların qətlə yetirilməsi harada baş verməsindən asılı olmayaraq qəbuledilməzdir və qınanmalıdır”.
Bondi çimərliyində qanlı hücum
Avstraliya polisi bazar günü yaydığı məlumatda Sidneyin məşhur Bondi çimərliyində keçirilən tədbirə silahlı hücum nəticəsində azı 11 nəfərin öldüyünü, 16 nəfərin isə yaralandığını açıqlayıb. Hadisə ölkə ictimaiyyətində böyük sarsıntı yaradıb.
Hücumdan sonra Sidney şəhərində genişmiqyaslı təhlükəsizlik əməliyyatı başladılıb. Avstraliya polisi ərazidə ciddi təhlükəsizlik tədbirləri görərək hadisə yerini mühasirəyə alıb və əhaliyə bölgədən uzaq durmaqla bağlı çağırış edib.
Partlayıcı təhlükəsi ilə bağlı araşdırma
Avstraliya polisi “ABC” telekanalına açıqlamasında bildirib ki, Bondi çimərliyi yaxınlığında hücumu törədən şəxslərdən birinə məxsus avtomobildə əl istehsalı partlayıcı qurğu aşkar edilib. Hazırda mütəxəssis qruplar həmin partlayıcının zərərsizləşdirilməsi istiqamətində iş aparır.
Rəsmilər hücumun bütün detalları ilə bağlı istintaqın davam etdiyini və təhlükənin tam aradan qaldırılmasından sonra ictimaiyyətə əlavə məlumat veriləcəyini bildiriblər.
Hücumun hədəfi yəhudi icmasının tədbiri olub
İsrail mediasının yaydığı xəbərlərə görə, hücum “Xabad” (Chabad) yəhudi icmasının “Hanuka” bayramı münasibətilə təşkil etdiyi tədbiri hədəf alıb. Məlumatlara əsasən, Sidneydə “Xabad” missiyasının rəhbəri olan ravvin Eli Şlinqer hücum zamanı həyatını itirənlər arasında olub.
Hadisə beynəlxalq səviyyədə də ciddi narahatlıq doğurub və bir sıra ölkələr Sidneydə baş verən hücumu qınayan bəyanatlarla çıxış ediblər.
