İran ABŞ-la yeni görüşlərin keçirilməyəcəyini açıqladı
İran Xarici İşlər Nazirliyinin sözçüsü İsmayıl Bəqai Tehranda keçirdiyi mətbuat konfransında yaxın günlərdə ABŞ rəsmiləri ilə hər hansı görüşün planlaşdırılmadığını bildirib.
O, ləğv edilmiş görüşlərlə bağlı yayılan məlumatları da təkzib edərək, “Bu, hadisələrin həqiqi gedişatıdır və qarşıdakı günlər üçün ABŞ rəsmiləri ilə heç bir görüş nəzərdə tutulmur”, – deyə vurğulayıb.
“Addım qarşılığında addım” prinsipi dəyişməyib
Bəqai bildirib ki, İran ABŞ ilə imzalanmış anlaşma memorandumunu “addım qarşılığında addım” prinsipi əsasında icra edir.
Onun sözlərinə görə, Vaşinqton öz öhdəliklərinə əməl etdiyi müddətdə Tehran da razılaşmanın şərtlərinə sadiq qalacaq. O əlavə edib ki, İran heç bir addımı cavabsız qoymur və ABŞ-nin hərəkətlərinə müvafiq reaksiya verir.
Sözçü qeyd edib ki, memorandumun 13-cü bəndi yekun saziş üzrə danışıqları əhatə edir və həmin proses digər bəndlərin icrasından asılıdır. Onun sözlərinə görə, öhdəliklərin yerinə yetirilməməsi razılaşmanın gələcəyini risk altına sala bilər.
Hörmüz boğazı və Livan məsələsi
İsmayıl Bəqai vurğulayıb ki, İran Hörmüz boğazının idarə olunması ilə bağlı məsuliyyətini tam şəkildə dərk edir və bu məsələdə hər hansı xarici müdaxiləyə ehtiyac görmür.
Livanla bağlı mövqeyinin dəyişmədiyini bildirən sözçü ABŞ-ni İsraili üzərinə götürdüyü öhdəliklərə əməl etməyə və hücumları dayandırmağa məcbur etməyə çağırıb.
NATO və Avropaya ittiham
Bəqai NATO üzvü olan ölkələri ABŞ və İsrailin İrana qarşı hərbi əməliyyatlarına dəstək verməkdə ittiham edib.
O bildirib ki, bəzi Avropa dövlətlərinin sonradan verdiyi izahlar və ya məsuliyyətdən yayınmaq cəhdləri onların beynəlxalq hüquq qarşısındakı məsuliyyətini aradan qaldırmır.
İraq, Kanada və Fələstinlə bağlı açıqlamalar
İran rəsmisi xarici işlər naziri Abbas Əraqçinin Bağdada səfərinin əsas məqsədlərindən birinin şəhid lider Seyid Əli Xameneinin dəfn mərasimi ilə bağlı koordinasiya olduğunu bildirib.
Onun sözlərinə görə, İran İraqın müharibə dövründə nümayiş etdirdiyi mövqeyi yüksək qiymətləndirir və iki ölkə arasında münasibətlər möhkəm olaraq qalır.
Kanada ilə münasibətlərə toxunan Bəqai qeyd edib ki, diplomatik əlaqələri illər əvvəl Ottava kəsib və münasibətlərin bərpası üçün ilk rəsmi addım Kanada tərəfindən atılmalıdır.
Fələstin məsələsinə də toxunan sözçü beynəlxalq ictimaiyyəti və BMT-ni İsrailin Fələstində törətdiyi cinayətlərin qarşısını almaq üçün daha təsirli addımlar atmağa çağırıb.
