Dörd mərhələli əməliyyat barədə açıqlama
İran İnqilab Keşikçiləri Korpusu ABŞ-ın son hücumlarına cavab olaraq bir neçə mərhələdən ibarət hərbi əməliyyat həyata keçirdiyini və əməliyyatların davam etdiyini bəyan edib.
Qurumun açıqlamasına görə, ilk mərhələdə İordaniyada yerləşən “Əmir Həsən” aviabazası raketlər və pilotsuz uçuş aparatları ilə hədəfə alınıb. Bildirilir ki, hücum nəticəsində raket və yanacaq anbarlarında yanğın baş verib.
Bəhreyn və Küveytdəki ABŞ obyektlərinin vurulduğu iddia edildi
İnqilab Keşikçiləri Korpusunun məlumatına əsasən, ikinci mərhələdə Bəhreyndə yerləşən “Şeyx İsa” aviabazasında helikopterlərin təmiri və texniki xidməti mərkəzləri, P-8 tipli elektron kəşfiyyat təyyarələri üçün obyekt və ABŞ ordusunun pilotsuz uçuş aparatlarının komanda-idarəetmə mərkəzi hədəfə alınıb.
Üçüncü mərhələdə isə Küveytdə yerləşən “Əli Əl-Salim” ABŞ hərbi bazasında yanacaq anbarlarının və Patriot hava hücumundan müdafiə sisteminin məhv edildiyi iddia olunub.
Həmçinin “Əhməd Əl-Cabir” bazasında yerləşən FPS tipli strateji radar sisteminin də vurulduğu bildirilib.
Hörmüz boğazı ilə bağlı bəyanat
İnqilab Keşikçiləri Korpusu Hörmüz boğazının İranın suveren ərazisi olduğunu vurğulayaraq, ABŞ ordusunun bölgədəki fəaliyyətinə icazə verilməyəcəyini bəyan edib.
Qurum eyni zamanda Hərbi Dəniz Qüvvələrinin gecə saatlarında Hörmüz boğazında iki gəmini saxladığını açıqlayıb.
Dördüncü mərhələ və Omandakı hədəflər
İran tərəfi əməliyyatın dördüncü mərhələsində Küveytdə ABŞ ordusuna məxsus yer-yer raket bazasının hədəfə alındığını bildirib.
Açıqlamaya görə, HIMARS raket buraxılış qurğuları və sursat anbarları tamamilə məhv edilib.
Bundan əlavə, Bəhreynin Cufeyr bölgəsində yerləşən ABŞ hərbi infrastrukturunun, eləcə də Omanda yerləşən FPS tipli uzaqmənzilli radar və üzən müşahidə radarının raket və pilotsuz uçuş aparatları ilə vurulduğu iddia olunub.
Hörmüz boğazının açılması ilə bağlı şərt
İnqilab Keşikçiləri Korpusu bəyan edib ki, Hörmüz boğazının yenidən açılması üçün yeganə yol ABŞ ordusunun bölgəyə müdaxiləsini dayandırması və dövlətlərin ərazi sularına hörmət göstərməsidir.
Qurum həmçinin ABŞ-ı Mahşəhr şəhərində kənd təsərrüfatına məxsus su nasosunu hədəfə almaqda ittiham edib və xəbərdarlıq edib ki, ABŞ-ın bölgədəki müdaxiləsi davam edərsə, bu, qlobal neft və qaz sektoruna təsir göstərə biləcək daha geniş hadisələrə səbəb ola bilər.
Bəyanatda qeyd olunur ki, ABŞ-ın son hücumlarından biri zamanı Xürrəmabad şəhəri üzərində buraxıldığı bildirilən “Kruiz” raketi İranın hava hücumundan müdafiə qüvvələri tərəfindən vurulub.
