Əliyevdən Avropa institutlarına kəskin ittihamlar
Azərbaycan Prezidenti İlham Əliyev sentyabrın 15-də Bakıda keçirilən görüşdə Avropa institutlarının Azərbaycana münasibətdə qərəzli yanaşdığını bildirib.
Görüşdə Türk Dövlətləri Təşkilatının müsəlman dini idarə rəhbərləri Şurasının üzvləri, beynəlxalq konfransların nümayəndələri və dini qurumların təmsilçiləri iştirak edib.
İlham Əliyev çıxışı zamanı Avropa Şurası və Avropa Parlamentini Ermənistanı dəstəkləməkdə, Azərbaycana qarşı isə ikili standartlar tətbiq etməkdə ittiham edib.
Prezident Avropa Parlamentini sərt şəkildə tənqid edərək onu “rüşvətxorlar yuvası” adlandırıb və qurum daxilində korrupsiya hallarına münasibətin yetərli olmadığını bildirib.
Qarabağ məsələsi və AŞPA qərarına münasibət
İlham Əliyev Azərbaycanın 2023-cü ilin sentyabrında Qarabağ üzərində nəzarəti bərpa etməsindən sonra Avropa strukturlarının Bakıya qarşı mövqeyinin sərtləşdiyini qeyd edib.
O, Azərbaycan nümayəndə heyətinin Avropa Şurası Parlament Assambleyasında (AŞPA) fəaliyyətinə məhdudiyyət qoyulmasını Qarabağdakı hərbi əməliyyatlarla əlaqələndirib.
AŞPA-nın 2024-cü ilin yanvarında qəbul etdiyi qərarda isə Azərbaycanla bağlı insan hüquqları, siyasi məhbuslarla bağlı iddialar, jurnalistlərin fəaliyyəti və digər məsələlər əsas gətirilmişdi. Sənəddə həmçinin Qarabağdakı hadisələr və erməni əhalinin bölgəni tərk etməsi məsələsi də qeyd olunmuşdu.
Azərbaycan hərbi gücünü artıracaq
İlham Əliyev Ermənistanla sülh prosesinin davam etdiyini bildirib və uzunmüddətli sabitliyə ümid etdiyini vurğulayıb.
Bununla yanaşı, o qeyd edib ki, keçmiş müharibə və baş verən dağıntılar unudulmamalıdır. Azərbaycanın təhlükəsizlik məsələlərində diqqətli davranacağını bildirən dövlət başçısı hərbi imkanların gücləndirilməsinin vacibliyini qeyd edib.
Əliyevin sözlərinə görə, beynəlxalq münasibətlərdə güc amili mühüm rol oynayır və bu səbəbdən Azərbaycanın müdafiə potensialını artırması zəruridir.
Müsəlman ölkələrinə birlik çağırışı
İlham Əliyev çıxışında İslam dünyasına qarşı islamofob yanaşmaların mövcud olduğunu bildirib və müsəlman ölkələrinin həmrəyliyinin vacibliyini vurğulayıb.
İlham Əliyev müsəlmanların terrorla eyniləşdirilməsinə, dini dəyərlərə qarşı hücumlara və mənfi stereotiplərə qarşı birliyin əsas vasitə olduğunu bildirib.
O, Azərbaycanın Avropa təşkilatlarında təmsil olunan azsaylı müsəlman ölkələrindən biri olduğunu qeyd edərək, bu platformalarda qarşılaşdıqları məsələlərdən danışıb.
Əliyev bildirib ki, Azərbaycan milli maraqlarını və dəyərlərini qorumağa davam edəcək, heç bir təzyiq qarşısında geri addım atmayacaq.
Bakıda İslam Əməkdaşlıq Təşkilatının zirvəsi keçiriləcək
İlham Əliyev gələn il Bakıda İslam Əməkdaşlıq Təşkilatının zirvə görüşünün keçiriləcəyini açıqlayıb.
O, dini liderləri cəmiyyətlərdə sülhün, qarşılıqlı hörmətin və əməkdaşlığın təşviqinə töhfə verməyə çağırıb.
