İran gəmisinə hücum: ölən və yaralananlar var
İranın rəsmi mediası Qeşm adasının valisinə istinadən xəbər verib ki, ölkəyə məxsus ticarət gəmisi İranın cənub sahilləri yaxınlığında hücuma məruz qalıb.
Məlumata görə, hadisə bazar günü səhər saatlarında Hörmüz boğazı yaxınlığında baş verib.
Hücum nəticəsində bir nəfərin öldüyü, üç nəfərin isə yaralandığı bildirilib.
Bölgədə təhlükəsizlik vəziyyətinin pisləşməsi enerji daşımaları ilə bağlı narahatlıqları daha da artırıb.
Hörmüzdə yeni insident enerji bazarlarını silkələdi
Britaniyanın Dəniz Ticarət Əməliyyatları qurumu daha əvvəl Hörmüz boğazından keçən bir gəminin mərmi hücumuna məruz qalması ilə bağlı məlumat aldığını açıqlamışdı.
Hadisə neft tədarükünün təhlükəsizliyi ilə bağlı beynəlxalq narahatlıqları gücləndirib.
Hörmüz boğazı dünya neft daşımalarının əsas keçidlərindən biri hesab olunur və burada yaranan hər hansı təhlükə qlobal bazarlara birbaşa təsir edir.
Səudiyyə Ərəbistanı neft xəttini müvəqqəti dayandırdı
Yeni insident Səudiyyə Ərəbistanının “Şərq-Qərb” neft kəmərinin fəaliyyətini müvəqqəti dayandırmasından bir gün sonra baş verib.
1200 kilometr uzunluğundakı kəmərin pilotsuz uçuş aparatları ilə hücuma məruz qaldığı iddia edilib.
Səudiyyə tərəfi hücumların İraq ərazisindən həyata keçirildiyini bildirib, lakin İraq İslami Müqaviməti bu iddiaları rədd edib.
Neft qiymətləri yüksəlir: enerji böhranı dərinləşir
Bölgədə artan təhlükəsizlik böhranı fonunda “Brent” markalı neftin qiyməti 100 dollar həddini keçib.
ABŞ-də dizelin qiyməti isə tarixdə ilk dəfə qallon üçün 6 dolları ötüb.
“Şərq-Qərb” neft xətti gündəlik 4-5 milyon barrel neft daşımaq gücünə malikdir. Bu isə qlobal neft tədarükünün təxminən 4-5 faizinə bərabərdir.
Xətt son aylarda Hörmüz boğazında yaranan məhdudiyyətlər fonunda Körfəz ölkələri üçün əsas alternativ ixrac marşrutlarından biri olub.
Oman görüşü Hörmüzün gələcəyini müəyyən edə bilər
Oman paytaxtı Maskatda bazar ertəsi Hörmüz boğazının gələcəyi ilə bağlı görüş keçirilməsi planlaşdırılır.
Görüşdə Körfəz ölkələri, İraq və İran nümayəndələrinin iştirakı gözlənilir.
İran Xarici İşlər Nazirliyi də toplantıda iştirak edəcəyini açıqlayıb.
İranın “Təsnim” agentliyinə danışan mənbə bildirib ki, Tehran və Oman arasında keçid marşrutları ilə bağlı razılaşma görüşdə təqdim ediləcək.
Mənbənin sözlərinə görə, Hörmüz boğazının tam açılması üçün İranın müəyyən şərtləri var və Tehran boğaz üzərində suveren hüquqlarının tanınmasını tələb edir.
Vaşinqtonun isə İranın bu mövqeyinə qarşı olduğu bildirilir.
