SEPAH Hörmüzdə xüsusi əməliyyat keçirdiyini açıqladı
İran İslam İnqilabı Keşikçiləri Korpusunun Hərbi Dəniz Qüvvələri çərşənbə axşamı ABŞ ordusuna məxsus ən yeni ağıllı və pilotsuz sualtı aparatlardan birini Hörmüz boğazının girişində ələ keçirdiyini açıqlayıb.
- SEPAH Hörmüzdə xüsusi əməliyyat keçirdiyini açıqladı
- Aparatın 2025-ci ildə ABŞ donanmasına verildiyi bildirilir
- “Dive-LD” hansı imkanlara malikdir?
- Uzunluğu 5,8 metr, çəkisi təxminən 3 tondur
- Müxtəlif avadanlıqlar quraşdırıla bilir
- Dəniz dibinin xəritəsini hazırlaya bilir
- SEPAH iki gün əvvəl də ABŞ qüvvələri ilə bağlı açıqlama vermişdi
- Hörmüzdə bu dəfə sualtı aparat gündəmə gəldi
SEPAH-ın məlumatına görə, ələ keçirilən aparat “Dive-LD” növünə aiddir.
Açıqlamadan əvvəl İran televiziyası SEPAH Hərbi Dəniz Qüvvələrinin döyüşçülərinin boğazda həyata keçirdiyi xüsusi əməliyyatla bağlı mühüm məlumatın yayımlanacağını bildirmişdi.
Aparatın 2025-ci ildə ABŞ donanmasına verildiyi bildirilir
SEPAH ələ keçirildiyini açıqladığı ABŞ sualtı aparatının bu sahədə ən qabaqcıl texnologiyalardan istifadə etdiyini bildirib.
Məlumata əsasən, sözügedən sualtı aparat 2025-ci ildə ABŞ donanmasının istifadəsinə verilib.
“Dive-LD” hansı imkanlara malikdir?
“Dive-LD” pilotsuz sualtı aparatı ABŞ-nin “Anduril Industries” şirkətinin istehsalıdır.
Aparatın ilk nümunəsi 2025-ci ildə ABŞ Hərbi Dəniz Qüvvələrinin pilotsuz sualtı sistemlər bölməsinə təhvil verilib.
Uzunluğu 5,8 metr, çəkisi təxminən 3 tondur
“Dive-LD” sisteminin uzunluğu təxminən 5,8 metr, çəkisi isə üç tona yaxındır.
Pilotsuz aparat dərin sularda uzunmüddətli və müstəqil tapşırıqların yerinə yetirilməsi üçün hazırlanıb.
İstehsalçının açıqladığı texniki göstəricilərə əsasən, “Dive-LD” suyun altında 10 günədək fəaliyyət göstərə və 6 min metr dərinliyə enə bilir.
Bu göstəricilər aparatın uzunmüddətli sualtı əməliyyatlarda istifadə edilməsinə imkan verir.
Müxtəlif avadanlıqlar quraşdırıla bilir
Pilotsuz sualtı aparatın quruluşu müxtəlif tapşırıqlara uyğunlaşdırıla bilir.
Onun bəzi hissələrinin üçölçülü çap texnologiyası ilə istehsal edilməsi müxtəlif növ sensorların və tapşırıq üçün nəzərdə tutulan yüklərin sürətlə quraşdırılmasına imkan yaradır.
Dəniz dibinin xəritəsini hazırlaya bilir
“Dive-LD”nin mümkün əməliyyat vəzifələri arasında sualtı kəşfiyyat və müşahidə mühüm yer tutur.
Aparatdan dəniz dibinin xəritəsinin hazırlanması, minaların aşkarlanması, sualtı kabellərin və boru xətlərinin yoxlanılması üçün istifadə oluna bilər.
Bundan başqa, “Dive-LD” sualtı qayıqlara qarşı əməliyyatlara dəstək və məlumatların ötürülməsi məqsədilə də istifadə edilə bilər.
Aparatın əsas üstünlükləri sırasında müstəqil fəaliyyət göstərməsi, uzun müddət əməliyyat şəraitində qala bilməsi və yerinə yetirəcəyi tapşırığın xüsusiyyətlərinə uyğunlaşdırılması göstərilir.
SEPAH iki gün əvvəl də ABŞ qüvvələri ilə bağlı açıqlama vermişdi
İran SEPAH-ı bundan iki gün əvvəl ABŞ ordusuna məxsus bir təyyarədaşıyan gəmini və bir esminesi ballistik raketlərlə hədəfə aldığını açıqlamışdı.
SEPAH-ın açıqlamasına görə, hər iki hərbi gəmi vurulduqdan sonra ərazidən uzaqlaşmağa məcbur edilib.
İran tərəfi hücumların davam edəcəyi təqdirdə daha genişmiqyaslı cavabların veriləcəyi barədə də xəbərdarlıq etmişdi.
Hörmüzdə bu dəfə sualtı aparat gündəmə gəldi
Son açıqlamada isə SEPAH diqqəti Hörmüz boğazının girişində həyata keçirildiyi bildirilən əməliyyata yönəldib.
İran tərəfinin məlumatına görə, əməliyyat nəticəsində ABŞ ordusunun ən yeni pilotsuz sualtı sistemlərindən hesab edilən “Dive-LD” ələ keçirilib.
Sözügedən aparatın 2025-ci ildə ABŞ donanmasına təhvil verildiyi, 10 günədək su altında qala bildiyi və 6 min metr dərinliyə enmək imkanına malik olduğu bildirilir.
