Tankerə zərbə endirildi
Britaniyanın Dəniz Ticarəti Əməliyyatları İdarəsi (UKMTO) Oman Sultanlığının “Lima” bölgəsinin şimal-şərqində, Hörmüz boğazı yaxınlığında yeni təhlükəsizlik hadisəsinin baş verdiyini açıqlayıb.
Məlumata görə, tanker naməlum mənşəli mərminin hədəfinə çevrilib. Hücum nəticəsində gəminin mühərrik bölməsi ciddi zədələnib və tanker idarəetməni itirib.
Heyət arasında itki yoxdur
İlkin məlumatlara əsasən, hadisə zamanı ekipaj üzvləri arasında ölən və ya yaralanan olmayıb. Eyni zamanda, ətraf mühitə neft sızması və ya digər ekoloji zərərin qeydə alınmadığı bildirilib.
Hadisənin baş verdiyi “Lima” bölgəsi Omanın Musəndəm yarımadasında, Hörmüz boğazının giriş hissəsində yerləşir və dünyanın ən strateji dəniz marşrutlarından biri hesab olunur.
İran Hörmüz boğazı ilə bağlı xəbərdarlığını təkrarlayıb
Hadisə İran İnqilab Keşikçiləri Korpusunun Hörmüz boğazı ilə bağlı sərt açıqlamalarından sonra baş verib.
İran tərəfi yayımladığı görüntülərdə icazəsiz marşrutdan keçməyə çalışan neft tankerlərinə xəbərdarlıq edildiyini bildirib. Rəsmi Tehranın mövqeyinə görə, ABŞ-ın bölgədəki müdaxilələri və təhdidləri davam etdiyi müddətdə Hörmüz boğazında hərəkət yalnız İranla koordinasiya əsasında mümkün olacaq.
İran həmçinin ABŞ-ın bölgədəki fəaliyyətini əsas gətirərək Hörmüz boğazının təhlükəsizlik vəziyyətinin dəyişdiyini və gərginliyin davam etdiyini vurğulayıb.
