Fələstin qruplarından ortaq mesaj
Fələstin müqavimət qrupları “Nəqbə”nin 78-ci ildönümü münasibətilə yayımladıqları bəyanatlarda Fələstin xalqının geri dönüş və öz müqəddəratını təyin etmə hüququna sadiq olduqlarını bildiriblər.
Qruplar İsrailin Fələstin torpaqları üzərində hər hansı legitimlik və suverenliyini qəbul etmədiklərini vurğulayıblar.
HƏMAS: “Müqavimət silahı işğal bitənə qədər qalacaq”
HƏMAS bəyan edib ki, 1948-ci ildən başlayan “Nəqbə”nin nəticələri bu gün də davam edir.
Hərəkat xüsusilə son iki ildə Qəzzada davam edən müharibə, aclıq siyasəti və atəşkəs pozuntularına diqqət çəkib.
HƏMAS bildirib ki, İsrailin hücumları nəticəsində ötən ilin oktyabrından bu yana 850-dən çox fələstinli həyatını itirib.
Bəyanatda həmçinin qeyd olunub ki, İsrail Qərbi Şəriə və Qüdsdə məskunlaşma siyasəti, Əl-Əqsa məscidinə hücumlar və məcburi köç planlarını davam etdirir.
HƏMAS vurğulayıb ki, müqavimət beynəlxalq qanunlarla tanınan legitim hüquqdur və “müqavimət silahı işğal davam etdiyi müddətdə mövcud olacaq”.
“İslami Cihad”: “İsrail layihəsi bütün regionu hədəf alır”
Fələstin İslami Cihad Hərəkatı isə bəyan edib ki, İsrailin layihəsi təkcə Fələstini deyil, bütün ərəb və islam dünyasını hədəf alır.
Təşkilat İsrailin Qəzzada müharibəni, Qərbi Şəriədə isə həbs və dağıntı siyasətini davam etdirdiyini bildirib.
Hərəkat həmçinin Əl-Əqsa məscidi və İbrahim məscidinə qarşı hücumların bölgənin dini və tarixi kimliyini dəyişdirməyə yönəldiyini qeyd edib.
“Mücahidlər Hərəkatı”: “Müqavimət strateji seçimdir”
Fələstin Mücahidlər Hərəkatı açıqlamasında İsrailin Qəzza, Qərbi Şəriə və Qüdsdə hücumlarını davam etdirdiyini bildirib.
Təşkilat Fələstin xalqının beynəlxalq susqunluğa və Qərb dəstəyinə baxmayaraq müqavimət göstərdiyini vurğulayıb.
Bəyanatda müqavimətin Fələstin xalqı üçün “strateji seçim” olduğu qeyd edilib və milli birliyin gücləndirilməsinə çağırış edilib.
“Nəqbə”nin ildönümündə geri dönüş hüququ vurğulanıb
Fələstin qrupları birgə mesajlarında bildiriblər ki, 78 il keçməsinə baxmayaraq Fələstin xalqı öz torpağına və hüquqlarına bağlı qalır.
Onların fikrincə, Fələstin məsələsini aradan qaldırmaq cəhdləri xalqın müqaviməti qarşısında uğursuz olacaq.
