Əraqçi Masqatda rəsmi danışıqlara başlayır
İranın xarici işlər naziri Abbas Əraqçi şənbə günü Omanın paytaxtı Masqata səfər edib.
İranın rəsmi İRNA agentliyinin məlumatına görə, səfər çərçivəsində Hörmüz boğazının idarə olunması, regional hadisələr və İran–Oman münasibətləri Oman rəsmiləri ilə müzakirə ediləcək.
Hörmüz boğazı əsas gündəm mövzusudur
Səfər İran rəsmilərinin Hörmüz boğazında gəmiçiliyin idarə olunmasının yalnız sahilyanı dövlətlərin – İran və Omanın səlahiyyətində olacağı barədə son açıqlamaları fonunda baş tutur.
Tehran daha əvvəl boğazın fəaliyyətinin xüsusi razılaşdırılmış mexanizmlər əsasında tənzimlənəcəyini bəyan etmişdi.
Texniki məsləhətləşmələr davam edir
İran Xarici İşlər Nazirliyinin sözçüsü İsmayıl Bəqai bildirib ki, Əraqçinin Masqata səfəri son iki ay ərzində Omanla aparılan məsləhətləşmələrin davamıdır.
Onun sözlərinə görə, Hörmüz boğazı 2026-cı il 18 iyun tarixində ABŞ ilə imzalanmış memorandumun əsas məsələlərindən biridir.
Bəqai qeyd edib ki, indiyədək Tehran və Masqatda bu mövzu üzrə bir neçə texniki görüş keçirilib.
Təhlükəsiz gəmiçilik məsələsi müzakirə olunur
İran Xarici İşlər Nazirliyinin sözçüsü vurğulayıb ki, səfərin məqsədlərindən biri də Hörmüz boğazında təhlükəsiz gəmiçiliyin təmin olunması istiqamətində koordinasiyanın davam etdirilməsidir.
Səfərdən əvvəl bir sıra telefon danışıqları aparılıb
Abbas Əraqçi Masqata yola düşməzdən əvvəl Omanın xarici işlər naziri Bədr əl-Busaidi, Türkiyənin xarici işlər naziri Hakan Fidan və Pakistan ordusunun komandanı Asim Munirlə telefon danışığı aparıb.
İran XİN-in məlumatına görə, bu təmaslarda regiondakı vəziyyət və mümkün hərbi gərginlik məsələləri müzakirə olunub.
Son günlər ABŞ ilə İran arasında qarşılıqlı hərbi əməliyyatlar və Hörmüz boğazı ətrafında yaşanan hadisələr regionda gərginliyi artırıb.
