Kolumbiya hökuməti yeni sənədlər yayımladı
Kolumbiyanın Miqrasiya İdarəsi ABŞ-da seksual cinayətlərdə ittiham olunmuş maliyyəçi Cefri Epşteynin 2002-ci ildə ölkəyə səfər etdiyini təsdiqləyən sənədləri açıqlayıb.
Məlumat məhkəmə qərarı əsasında yayımlanıb. Sənədlərə görə, Epşteyn 2002-ci il iyulun 20-də Boqotadakı Eldorado hava limanından Mayamiyə uçub. Lakin onun ölkəyə giriş qeydlərinin olmadığı bildirilib.
Rəsmi qurum Epşteynin Kolumbiyada nə qədər qaldığının və səfərin məqsədinin hələ məlum olmadığını açıqlayıb.
Qisleyn Maksvell də Kolumbiyada olub
Sənədlərdə Epşteynin yaxın əməkdaşı Qisleyn Maksvellin də 2007-ci ildə Kolumbiyaya gəldiyi qeyd olunub.
Məlumata görə, Maksvell martın 19-da ölkəyə daxil olub və üç gün sonra Panamaya yollanıb.
Pastrananın adı yenidən gündəmdə
Hadisələrin Kolumbiyanın keçmiş prezidenti Andres Pastrananın hakimiyyəti dövrünə təsadüf etməsi ölkədə yeni siyasi müzakirələr yaradıb.
ABŞ Ədliyyə Nazirliyinin açıqladığı Epşteyn sənədlərində Pastrananın adı bir neçə dəfə keçir.
Kolumbiyanın hazırkı prezidenti Qustavo Petro “X” platformasında paylaşım edərək bildirib: “Kolumbiya Miqrasiya İdarəsi təsdiqləyir ki, Epşteyn Andres Pastrananın hakimiyyəti dövründə ölkədə olub.”
Şəxsi təyyarə və gizli yazışmalar
Epşteyn sənədlərinə əsasən, Andres Pastrana 2003-cü ildə maliyyəçinin şəxsi təyyarəsinin sərnişinlərindən biri olub.
Sənədlərdə Pastrananın həm Epşteyn, həm də Maksvell ilə yaxın əlaqələrinə işarə edən elektron məktubların olduğu qeyd edilir.
Hərbi geyimdə foto diqqət çəkdi
İctimaiyyətə təqdim olunan materiallar arasında 2002-ci ilə aid fotoşəkil də yer alıb. Şəkildə Pastrana və Maksvell Kolumbiya Hərbi Hava Qüvvələrinin formasında görünürlər.
Maksvellin məxfiliyi ləğv edilmiş elektron yazışmalarında isə Kolumbiyada “Black Hawk” hərbi helikopterini idarə etdiyini və Amazon bölgəsində silahlı qruplara qarşı havadan atəş açdığını iddia etdiyi bildirilir.
Pastrana əlaqələri etiraf edib
Keçmiş prezident Andres Pastrana Epşteyn və Maksvell ilə bir neçə dəfə görüşdüyünü qəbul edib.
Lakin o, bu görüşlərin yalnız rəsmi xarakter daşıdığını və şəxsi münasibət olmadığını müdafiə edir.
