Tehran Küveytin açıqlamalarını qəbul etmədi
İran Xarici İşlər Nazirliyi Küveytin xarici işlər və daxili işlər qurumlarının İranın “düşmən fəaliyyətləri planlaşdırdığı” barədə səsləndirdiyi ittihamları rədd edib.
Rəsmi Tehran yayılan bəyanatları “əsassız və qəbuledilməz” adlandırıb.
Nazirlik həmçinin Küveyt hökumətini dörd iranlı əməkdaşla bağlı məsələdən “siyasi və təbliğat məqsədilə istifadə etməkdə” ittiham edib.
“İranlı əməkdaşlar adi patrul xidməti həyata keçirirdi”
Xarici İşlər Nazirliyi bildirib ki, saxlanılan dörd İran vətəndaşı adi dəniz patrulu çərçivəsində xidmət aparırdı.
Açıqlamada qeyd olunub ki, onların Küveytin ərazi sularına daxil olması naviqasiya sistemində yaranmış texniki nasazlıq səbəbindən baş verib.
Tehran suverenliyə hörmət etdiyini vurğuladı
İran tərəfi bölgə ölkələrinin, o cümlədən Küveytin suverenliyi və ərazi bütövlüyünə hörmət siyasətinə sadiq qaldığını bəyan edib.
Tehran Küveyt rəsmilərini “tələsik bəyanatlar və zəif ittihamlardan” çəkinməyə çağıraraq məsələlərin rəsmi diplomatik kanallar vasitəsilə həll edilməsinin vacibliyini vurğulayıb.
İran saxlanılan şəxslərin azad edilməsini istəyir
İran Xarici İşlər Nazirliyi Küveytdəki İran səfirliyinin saxlanılan şəxslərlə əlaqə saxlamasına şərait yaradılmasını tələb edib.
Rəsmi Tehran həmçinin həmin şəxslərin dərhal azad olunmasını istəyib.
Küveyt nə açıqlamışdı?
Bundan əvvəl Küveyt Müdafiə Nazirliyinin sözçüsü polkovnik Səud Əbdüləziz əl-Atvan ölkənin silahlı qüvvələrinin dəniz yolu ilə qanunsuz keçid cəhdinin qarşısını aldığını açıqlamışdı.
Onun sözlərinə görə, Küveyt qüvvələri ərazi sularına daxil olan dörd nəfəri saxlayaraq aidiyyəti qurumlara təhvil verib.
