Yeni maddə təklif olunur
Azərbaycanda terror fəaliyyəti ilə bağlı cəzaların sərtləşdirilməsi istiqamətində mühüm dəyişikliklər hazırlanıb. Məlumata görə, bununla bağlı Cinayət Məcəlləsinə yeni maddənin əlavə edilməsi təklif edilir.
Təklif edilən dəyişikliklər terror təşkilatlarının yaradılması, idarə olunması və fəaliyyətində iştirak halları üçün daha ağır cəzaların tətbiqini nəzərdə tutur.
Rəhbərlik və təşkil etməyə görə ağır cəza
Layihəyə əsasən, terror təşkilatı yaratma və ya ona rəhbərlik etmə halları üçün 10 ildən 14 ilədək azadlıqdan məhrumetmə cəzası müəyyənləşdirilir.
Bu cəzalar Cinayət Məcəlləsinin bir sıra maddələrində nəzərdə tutulan ağır cinayətlərin törədilməsi məqsədilə belə təşkilatların yaradılmasını əhatə edir.
Üzvlük və iştirak üçün cəza
Sənədə görə, terror təşkilatına üzv olma və ya onun fəaliyyətində iştirak etmə də ciddi cinayət hesab olunacaq.
Bu halda 7 ildən 12 ilədək müddətə azadlıqdan məhrumetmə cəzası tətbiq ediləcək.
Əməkdaşlıq edənlər üçün istisna
Qanun layihəsində diqqət çəkən məqamlardan biri də müəyyən hallarda cinayət məsuliyyətindən azadolma ilə bağlıdır.
Belə ki, əgər şəxs vaxtında hüquq-mühafizə orqanlarına məlumat verərsə və ya terror fəaliyyətinin qarşısının alınmasına kömək edərsə, həmçinin cinayətkarların ifşasında iştirak edərsə, o zaman məsuliyyətdən azad oluna bilər.
Bu güzəşt yalnız həmin şəxsin başqa cinayət əməli törətmədiyi hallarda tətbiq olunacaq.
