ABŞ-dan İrana yeni sanksiya paketi
ABŞ Maliyyə Nazirliyi İranla əlaqəli yeni sanksiyalar tətbiq etdiyini açıqlayıb.
Nazirliyin bəyanatına görə, sanksiyalar Vaşinqtonun “Mahan Air” aviaşirkətinə dəstək verdiyini bildirdiyi beynəlxalq şəbəkələri və İran İslam İnqilabı Keşikçiləri Korpusu (SEPAH) ilə əlaqələndirilən bir şirkəti hədəf alır.
Bir neçə ölkədə fəaliyyət göstərən şəxslər və şirkətlər siyahıya salınıb
ABŞ Maliyyə Nazirliyinin məlumatına əsasən, sanksiya siyahısına Çin, Hindistan, Rusiya və İranda fəaliyyət göstərən ümumilikdə 6 hüquqi və fiziki şəxs daxil edilib.
Vaşinqton iddia edir ki, həmin şəxslər və şirkətlər ABŞ və Avropa İttifaqının sanksiyaları altında olan “Mahan Air” üçün satış agentləri və dəstək şəbəkəsi kimi fəaliyyət göstəriblər.
SEPAH-la əlaqələndirilən şirkət də hədəfdədir
ABŞ Maliyyə Nazirliyi, həmçinin SEPAH-a bağlı olduğunu bildirdiyi bir “örtük şirkəti”nə qarşı da sanksiyalar tətbiq olunduğunu açıqlayıb.
Vaşinqton uzun müddətdir iddia edir ki, “Mahan Air” İran İslam İnqilabı Keşikçiləri Korpusunun əməkdaşlarını, eləcə də silah və pilotsuz uçuş aparatlarını daşımaq üçün istifadə olunur. İran tərəfi isə bu ittihamlarla bağlı müxtəlif vaxtlarda irəli sürülən iddiaları qəbul etməyib.
