ABŞ-dan Hörmüz boğazı ilə bağlı güzəşt
İranlı mənbənin verdiyi məlumata görə, ABŞ Hörmüz boğazının cənub marşrutunun bağlı qalmasını nəzərdə tutan güzəşt təklifi ilə çıxış edib.
Məlumata əsasən, Tehran Vaşinqtonun son təklifinə cavab olaraq bildirib ki, müharibə tam başa çatmayınca Hörmüz boğazının açılması mümkün deyil.
Tehran mövqeyini dəyişmir
Son həftələrdə ABŞ-ın İrana qarşı hərbi əməliyyatlarla yanaşı, bəzi ticarət gəmilərini Hörmüz boğazındakı qanunsuz marşrutlardan keçməyə təşviq etdiyi bildirilir.
İran tərəfi bu addımların təhlükəsizlik riskləri yaratdığını vurğulayaraq, bəzi gəmilərin geri qaytarıldığını və boğazın bağlanmasının davam etdiyini qeyd edir.
Tehran Hörmüz boğazının idarə olunmasının İranın suveren hüququ olduğunu və bu prosesin Omanla, eləcə də region ölkələri ilə koordinasiya əsasında həyata keçirilməli olduğunu bildirir.
Tramp razılaşmadan danışıb
ABŞ Prezidenti Donald Tramp bazar gecəsi Hörmüz boğazı ilə bağlı razılaşmanın əldə olunacağını iddia edib.
O, həmçinin İranın nüvə proqramı ilə bağlı da ayrıca razılaşmanın mümkün olduğunu bildirib və Vaşinqtonun Tehranla danışıqların formatı üzərində işlədiyini açıqlayıb.
İran ABŞ-la danışıqları təkzib edib
Buna baxmayaraq, İran Xarici İşlər Nazirliyinin sözçüsü İsmayıl Bəqayi hazırda ABŞ ilə heç bir danışıqların aparılmadığını bəyan edib.
Onun sözlərinə görə, İranın danışıqlar heyəti ölkə daxilindədir və yaxın günlərdə nə vasitəçi nümayəndə heyətlərinin qəbul edilməsi, nə də xaricdə hər hansı görüşün keçirilməsi planlaşdırılır.
Bəqayi əlavə edib ki, Omanla aparılan müzakirələr yalnız Hörmüz boğazında təhlükəsiz gəmiçilik marşrutunun müəyyənləşdirilməsinə yönəlib və bu danışıqlar ikitərəfli xarakter daşıyır.
