İran hücumları ABŞ bazalarını vurdu
ABŞ-ın Kato İnstitutu açıqlayıb ki, İranın raket və pilotsuz uçuş aparatları regionda ən azı 12 ABŞ hərbi bazasını hədəfə alıb.
Bu bazalar arasında Bəhreyndə yerləşən 5-ci donanmanın qərargahı və Qətərdəki Əl-Udeyd aviabazası da var.
Bazaların zəifliyi üzə çıxdı
Hesabata görə, zərbələrin miqyası o qədər böyük olub ki, bəzi ABŞ hərbçiləri məsafədən işləməyə yönləndirilib. Hətta bölgədəki bir sıra bazaların “yaşayış üçün yararsız hala düşdüyü” qeyd edilir.
İranın üstünlüyü: coğrafiya və davamlı hücumlar
Təhlildə bildirilir ki, İranın coğrafi üstünlüyü və uzunmüddətli hücum qabiliyyəti ABŞ-ı diplomatik danışıqlara məcbur edən əsas amillərdən biri olub.
Hörmüz boğazının bağlanması isə qlobal enerji bazarlarına təsir edərək Tehrana əlavə təzyiq aləti qazandırıb.
ABŞ itkiləri və zərbələr
Məlumata görə, Küveytdə yerləşən bazalara hücum nəticəsində 6 ABŞ əsgəri həlak olub. Səudiyyə Ərəbistanındakı Əmir Sultan aviabazasında isə “E-3 Sentry” erkən xəbərdarlıq təyyarəsi məhv edilib və digər hərbi texnikalara ciddi ziyan dəyib.
40 minlik qüvvə hədəfə çevrildi
Ekspertlər qeyd edir ki, regionda yerləşdirilən təxminən 40 min ABŞ hərbçisi İran üçün “asan hədəflər” yaradıb.
Sakit okean bölgəsi üçün də xəbərdarlıq
Kato İnstitutu eyni zəifliyin Asiya-Sakit okean bölgəsində də mövcud olduğunu vurğulayıb. ABŞ-ın bu bölgədə 80 minə yaxın hərbçisi və çoxsaylı bazası var.
Çinin raket arsenalının daha inkişaf etmiş olduğu qeyd edilərək, potensial münaqişədə risklərin daha yüksək ola biləcəyi bildirilib.
ABŞ strategiyası sual altındadır
Analitiklər belə nəticəyə gəlir ki, böyük və sabit hərbi bazalar artıq müasir müharibə şəraitində ciddi risk daşıyır və Vaşinqton bu strategiyanı yenidən nəzərdən keçirməlidir.
