Ayətullah Seyid Əli Xamenei: “İran xalqı Prezident və hökumətin ağır yükünü bölüşməlidir”
İran İslam Respublikasının Ali Dini Lideri Ayətullah Seyid Əli Xamenei ölkə ictimaiyyətinə müraciətində xalqı Prezident Məsud Pezeşkiana və hökumətə qəti dəstək verməyə çağırıb. O vurğulayıb ki, siyasi cərəyanlar arasında fikir ayrılıqları olsa belə, düşmənlərin təzyiqləri qarşısında birlik qorunmalıdır.
Ayətullah Seyid Əli Xamenei çıxışında qeyd edib ki, İran xalqı iyunun əvvəlində yaşanan 12 günlük qarşıdurma zamanı ABŞ və İsrail rejimini “şübhəsiz şəkildə” məğlub etməyi bacardı. Onun sözlərinə görə, Vaşinqtonun hərbi və texnoloji gücü İran xalqının iradəsini sındıra bilməyib.
“İran digər dövlətlərdən daha artıq səfərbərliyə ehtiyac duyur”
Ali Lider bildirib ki, xarici müdaxilə cəhdləri və regiondakı gərginlik fonunda İranın səfərbərlik ruhuna əvvəlkindən daha çox ehtiyacı var. Ayətullah Xamenei səfərbərlik mədəniyyətinin yeni nəsillərə ötürülməsinin vacibliyini vurğulayaraq, bütün dövlət qurumlarını “səfərbərlik ruhu ilə çalışmağa” səsləyib.
O əlavə edib ki, İran İslam İnqilabı Keşikçiləri Korpusu (SEPAH) səfərbərliyin rəsmi siması sayılsa da, bu ölkə üçün fədakarlıq edən hər bir vətənpərvər qurum və vətəndaş “səfərbərlik ailəsinin bir parçasıdır”. Ayətullah Seyid Əli Xamenei həmçinin 12 günlük təcavüz zamanı şəhid olan iranlı alimlərin səfərbərlik ruhunun canlı nümunəsi olduğunu bildirib.
“Müqavimət xətti nəsildən-nəslə ötürülməlidir”
Ayətullah Xamenei vurğulayıb ki, bölgədə müqavimət hərəkatı davamlı şəkildə inkişaf edəcək və dünya məzlumları özlərini tək hiss etməyəcək. Onun sözlərinə görə, İranın möhkəm duruşu bir daha göstərdi ki, ölkə “iradə və güc mərkəzidir” və heç bir təzyiq qarşısında geri çəkilmir.
ABŞ-la bağlı yayılan iddialar təkzib edildi
Ali Lider İranın vasitəçi ölkə üzərindən ABŞ-a mesaj göndərdiyi barədə yayılan məlumatları əsassız adlandırıb. Ayətullah Xamenei qeyd edib ki, İsrail rejiminin Livan, Suriya, Qəzza və İordan çayının qərb sahilinə qarşı həyata keçirdiyi təcavüzlər ABŞ-ın birbaşa dəstəyi olmadan mümkün olmazdı.
O bildirib ki, ABŞ-ın dünyanın müxtəlif bölgələrinə müdaxiləsi Vaşinqtonu tədricən beynəlxalq arenada təcrid edir və ölkənin nüfuzunu zəiflədir.
